काठमाडौ १४ साउन । प्रधानमन्त्री केपी शर्मा ओलीले नेपाल विकासशील राष्ट्रमा स्तरोन्नति हुनु ‘समृद्ध नेपाल र सुखी नेपाली’ को सफल कार्यान्वयनको नतिजाको सुरुवात बिन्दु भएको बताएका छन्।

राष्ट्रिय सभामा बुधबार सम्बोधन गर्दै प्रधानमन्त्री ओलीले यस्तो बताएका हुन्। उनले नेपाल अति कम विकसित मुलुकबाट विकासशील मुलुकमा स्तरोन्नति हुन विगत लामो समयदेखि प्रयत्नरत रहेको बताए। उनले ४५ देशका समूहको नेतृत्व गरेको नेपाल ७ मुलुकसँगै अर्को वर्ष स्तरोन्नति हुने जानकारी दिए।

नेपाल आत्मनिर्भर हुने दिशातर्फ अघि बढेको संकेत भएको प्रधानमन्त्री ओलीको भनाई थियो। अब नेपालको सूचांक बलियो बन्ने र लगानीको लागि थप वातावरण तयार हुने उनले बताए।

प्रधानमन्त्री ओलीले भने, ‘नेपाल अति कम विकसित मुलुकबाट विकासशील मुलुकमा स्तरोन्नति हुन विगत लामो समयदेखि प्रयत्नरत रहेको सबैलाई विदितै छ। सन् १९७१ नोभेम्बर १८ मा संयुक्त राष्ट्र संघको महासभाले २७६८ नं। को प्रश्ताव पारित गरी नेपाललाई अतिकम विकसित मुलुकको सूचीमा सूचीकृत गरेको आज ५५ वर्षपछि हामीले यो अवसर प्राप्त गर्दैछौं। ४५ देशका समूहको नेतृत्व गरेको नेपाल ७ मुलुकसँगै अर्को वर्ष स्तरोन्नति हुँदैछ। यो खुशीको कुरा हो हाम्रो अन्तर्राष्ट्रिय छवी उँचा हुने र नेपाल आत्मनिर्भर हुने दिशातर्फ अघि बढेको यो संकेत हो। नेपालको सूचांक बलियो बन्नेछ र लगानीको लागि थप वातावरण तयार हुनेछ।’

उनले थपे, ‘यसमा विगतको १५ औँ योजना र चालु १६ औँ योजनाले लिएका लक्ष्य ‘समृद्ध नेपाल र सुखी नेपाली’ को सफल कार्यान्वयनको नतिजा देखापर्न थालेको छ। अहिले आर्थिक सुधारका राम्रा लक्षण देखापर्न थालेका छन्। चालू सोह्रौं योजनाको सामाजिक न्याय, सुशासन र समृद्धिका दुरदृष्टि, लक्ष्य र उद्देश्यहरु स्तरोन्नति पछिको अवस्थालाई आधारमानी तयार गरिएको छ।’

प्रधानमन्त्री ओलीले नेपाललाई द्विपक्षीय बहुपक्षीय सहकार्यबाट पनि अन्तर्राष्ट्रिय सहयोग जुटाउन, लगानी वृद्धि गर्न र ऋण लिन पनि सहयोग पुग्ने गरी अवसर जुटेको बताए।