काठमाडौ ८ जेठ । राष्ट्रियसभा अन्तर्गतको सङ्घीयता सबलीकरण तथा राष्ट्रिय सरोकार समितिले मनसुनअघि नै जोखिमको अनुमान गरेर पूर्वतयारी थाल्न सरकारलाई निर्देशन दिएको छ ।

आज बसेको बैठकले जोखिम अनुमान र विपद् व्यवस्थापनसम्बन्धी सरकारी नीति तथा योजनाको प्रभावकारी कार्यान्वयन गर्न सरकारलाई निर्देशन दिएको समिति सभापति सोनाम गेल्जेन शेर्पाले जानकारी दिनुभयो । बैठकमा सांसदहरूले मनसुनअघि नै विपद् जोखिम न्यूनीकरण गर्न पूर्वतयारी गर्नुपर्नेमा जोड दिएका थिए ।

यस्तै बैठकमा राष्ट्रिय जोखिम न्यूनीकरण तथा व्यवस्थापन प्राधिकरणका कार्यकारी प्रमुख दिनेशप्रसाद भट्टले यस वर्ष औसतभन्दा बढी वर्षा हुने भन्दै विपद् प्रतिकार्य तथा पूर्वतयारीका लागि कार्य गर्नुपर्ने र तीनै तहका सरकारबीचको समन्वय बढाउनुपर्नेमा जोड दिनुभयो । उहाँले नेपालमा बितेको १० वर्षमा आठ हजार चार सय ४१ वटा मनसुनजन्य घटना भएका पनि जानकारी गराउनुभयो ।