काठमाडौं ११ बैशाख । १०६ मेगावाटको जगदुल्ला जलविद्युत् आयोजनाको ठेक्कामा २ चिनियाँ कम्पनी मुद्दा मामिलामा लागेका छन्।

जगदुल्लामा प्राविधिक मूल्यांकनमा छानिएको सिनो हाइड्रो कर्पोरेसनले अर्को चिनियाँ कम्पनी जियाङ्सी कन्स्ट्रक्सन इन्जिनियरिङ ९ग्रुप० कर्पोरेसन लिमिटेड ९जेसीई०विरुद्ध उजुरी दिएको हो।

सार्वजनिक खरिद अनुगमन कार्यालयमा दिइएको उजुरीमा जेसीईको हाइड्रोपावरमा काम गरेको आधिकारिक इतिहास नभएको र बोलपत्रअनुसार कम्पनीको योग्यता नै नपुग्ने दाबी गरिएको छ।

प्राविधिक मूल्यांकनमा यी २ कम्पनी छानिएका छन्। तर कम रकम प्रस्तावको आधारमा नेपाली कम्पनीसँग जेभी गरेको जेसीईले ठेक्का पाउने पक्कापक्की भइसकेको छ।

यस्तो अवस्थामा सिनो हाइड्रोले जेसीई–एएनके जेभीविरुद्ध उजुरी गरेको हो। जगदुल्ला हाइड्रोपावर कम्पनी लिमिटेडले गत वर्ष माघ ७ देखि फागुन २१ गतेसम्म आवेदन दिनसक्ने गरी ग्लोबल टेन्डर आह्वान गरेको थियो।

सिभिल र हाइड्रोमेकानिकल कामका लागि आह्वान भएको टेन्डरमा जेसीई–एएनके, सिनो हाइड्रो, टुएमजी–फेवा कन्स्ट्रक्सन, सिल–थ्रिएचसीले आवेदन दिएका थिए।

यीमध्ये दुई चिनियाँ कम्पनी प्राविधिक रुपमा छनोट भएको सूचना मंगलबार सार्वजनिक भएको थियो।

जगदुल्ला हाइड्रोपावर कम्पनी लिमिटेडले प्राविधिक प्रस्ताव मात्रै खोलेकाले आर्थिक प्रस्तावबारे वैशाख २४ गते मात्रै आधिकारिक जानकारी आउनेछ।

स्रोतका अनुसार जीसीई–एएनकेले १२ अर्ब १५ करोड रुपैयाँ प्रस्ताव गरेको छ भने सिनो हाइड्रोले भ्याटबाहेक १३ अर्ब १४ करोड रुपैयाँ प्रस्ताव गरेको छ।

‘चिनियाँ मन्त्रालय वा सरकारी निकायले ९एनडीआरसी० जेसीईलाई हाइड्रोपावरमा काम गर्नका लागि कुनै प्रमाणपत्र दिएको छैन’, उजुरीमा भनिएको छ, ‘आयोजना सम्पन्न गरेका कागजात आवश्यक पर्नेमा जेसीईले खरिद प्रक्रियामा बुझाएका कागजातहरु जीपीएस र जीआईएस लेकेसन, फोटोग्राफीको प्रमाण जाँचयोग्य छ।’

प्राविधिक योग्यता पुर्‍याउनका लागि विगतका अनुभवलाई गलत तरिकाले देखाएको आरोप जेसीईविरुद्ध लगाइएको छ।

सार्वजनिक खरिद अनुगमन कार्यालयलाई जेसीई–एएनके जेभीले बुझाएका प्रमाणलाई पुनः मूल्यांकन गर्न समेत अनुरोध गरिएको छ।

जेसीईले आयोजना सम्पन्न गरेको भनी देखाएका जीपीएसरजीआईएस लोकेसन, फोटोग्राफलाई परीक्षण गर्न उजुरीमा माग गरिएको छ।

‘जेसीईले यदि कुनै गलत विवरण पेस गरेको रहेछ भने सार्वजनिक खरिद नियमावलीअनुसार कारबाही गर्न अनुरोध छ’, उजुरीमा भनिएको छ।

खरिद प्रक्रियामा भारतीय कम्पनी एसआईएल र नेपाली थ्रिएचसी जेभीले भ्याटबाहेक १२ अर्ब ४६ करोडको प्रस्ताव गरेको थियो।

एसआईएल–थ्रिएचसी जेभी प्राविधिक रुपमा अयोग्य भएका छन्। सीउ इन्फ्रास्टक्चर लिमिटेड भारतीय कम्पनी हो भने हाई हिमालयन हाइड्रो ९थ्रिएचसी० नेपाली कम्पनी हो।

यसबाहेक अर्को टुएमजी फेवा जेभी पनि यस प्रक्रियामा सामेल छ। फेवा कन्स्ट्रक्सन प्रालिको नेतृत्वमा टर्किस कम्पनी टुएमजी इनस्याट मादेनसिल्क रहेको छ। प्राविधिक रुपमै बाहिरिएको कम्पनीले करिब १३ अर्ब नै प्रस्ताव गरेको थियो।

डोल्पामा निर्माण हुने आयोजना बनाउन २३ अर्ब लागत अनुमान गरिएको छ। जसमा १६ अर्ब ऋण र ७ अर्ब स्वपुँजीबाट जुटाउन लागिएको छ। अहिले सिभिल र हाइड्रो मेकानिकलको मात्रै ठेक्का लागेको छ। आयोजनाबाट ५ वर्षमा विद्युत् उत्पादन गर्ने लक्ष्य छ।