काठमाडौँ, २८ फागुन। राष्ट्रिय प्रजातन्त्र पार्टी (प्रजातान्त्रिक) कार्यसम्पादन समितिको बैठकले मंगलबार हुने राष्ट्रपति निर्वाचनमा नेपाली काँग्रेसका उम्मेदवार कुमारी लक्ष्मी राईलाई समर्थन गर्ने निर्णय गरेको छ ।

पार्टी अध्यक्ष पशुपतिशम्शेर जबराको अध्यक्षतामा केन्द्रीय कार्यालयमा आज बसेको बैठकले यही फागुन २४ गते कैलाली जिल्ला, घोडाघोडी नगरपालिका–५ देउकलीमा स्थानीयवासी किशोरी राधा चौधरीमाथि भएको कुटपिटको निन्दा गर्दै घटनामा संलग्न दोषीलाई कडाभन्दा कडा कारबाहीको माग गरेको महामन्त्री राजाराम श्रेष्ठले जानकारी दिनुभयो । त्रिभुवन अन्तर्राष्ट्रिय विमानस्थलमा आज अपराह्न युएस बंगला विमान दुर्घटनाग्रस्त भएकामा पार्टीले दुःख व्यक्त गर्दै निष्पक्ष छानविनको माग गरेको छ ।