काठमाडौँ, २७ फागुन। राष्ट्रिय जनता पार्टी नेपालका अध्यक्ष मण्डलका सदस्य महेन्द्रराय यादवले मुलुकको राष्ट्रिय एकता बलियो बनाउन र जनअपेक्षाअनुसारको आर्थिक समृद्धिका लागि वर्तमान सरकारलाई आफ्नो पार्टीको विश्वासको मत रहेको बताउनुभएको छ ।

प्रतिनिधिसभाको आजको दोस्रो बैठकमा प्रधानमन्त्रीले विश्वासको मत लिनेसम्बन्धी प्रस्तावमाथिको छलफलमा भाग लिँदै उहाँले प्रधानमन्त्री केपी शर्मा ओलीले आफ्नो पार्टीले उठाएका माग सम्बोधन गर्न सार्वजनिक प्रतिबद्धता जनाउनुपर्ने आग्रह गर्नुभयो ।

विगतमा राजपा नेपालले उठाएको संविधान संशोधनको माग पूरा हुन नसकेको बताउँदै नेपालीलाई संविधानप्रति अपनत्व खोज्नका लागि अहिलेको सरकार दुई तिहाइ बहुमत भएकाले माग पूरा हुने अपेक्षा गर्नुभयो ।

संघीय समाजवादी फोरम नेपालका सांसद सरिता गिरीले संविधान संशोधनमार्फत समानुपातिक समावेशीको व्यवस्था पूर्ण कार्यान्वयनको माग गर्दै सरकारलाई आफ्नो पार्टीको विश्वासको मत व्यक्त गर्नुभयो ।

राजनीतिक स्थिरतापछि जनताले सुशासन र समृद्धि चाहेको बताउँदै उहाँले यसका लागि समाजवाद उन्मुख राजनीति र अर्थ व्यवस्थालाई व्यवहारमा कार्यान्वयन गर्न सकेमात्र आर्थिक विकास र समृद्धि सम्भव छ भन्नुभयो ।

राष्ट्रिय प्रजातन्त्र पार्टीका सांसद राजेन्द्र लिङ्देनले वर्तमान सरकारलाई आफ्नो पार्टीको विश्वासको मत रहेको उल्लेख गर्दै भ्रष्टाचार नियन्त्रणका लागि प्रधानमन्त्री ओलीले गर्नुभएको प्रतिबद्धताको प्रशंसा गर्नुभयो ।

सांसद लिङ्देनले दृढ इच्छाशक्ति भए देश बनाउन कुनै पनि बहुमत र अल्पमतले रोक्न नसक्ने बताउँदै प्रधानमन्त्री ओलीलाई विगतका प्रतिबद्धता पूरा गर्न आग्रह गर्नुभयो ।

राष्ट्रिय जनमोर्चाका सांसद दुर्गा पौडेलले भ्रष्टाचार नियन्त्रणसम्बन्धी प्रधानमन्त्री ओलीको प्रतिबद्धता पूरा हुन सकेमात्र जनताका आशा भरोसा पूरा हुने बताउँदै सरकारलाई आफ्नो पार्टीको विश्वासको मत रहेको जाहेर गर्नुभयो ।

नेपाल मजदुर किसान पार्टीका सांसद प्रेम सुवालले सरकार राष्ट्रिय जनजीविकाको सवालमा सक्षम होस् भन्ने कामना गर्दै सरकारले युवालाई स्वदेशमा स्वरोजगारीको व्यवस्था गर्नुपर्ने माग गर्नुभयो ।

नेपाली काँग्रेसका सांसद पुष्पा भूसालले सरकारलाई लोकतन्त्र र मानवाधिकारका पक्षमा दृढताका साथ उभिन आग्रह गर्दै गुण र दोषका आधारमा सरकारका कामको समर्थन र विरोध गर्ने धारणा व्यक्त गर्नुभयो ।

काँग्रेसका सांसद गगन थापाले मुलुक समृद्धिका लागि व्यक्ति नभई सरकारका संरचना बलियो हुनुपर्ने बताउँदै सरकारका कमी कमजोरीप्रति खबरदारी गर्न काँग्रेसले प्रतिपक्षमा बस्ने निर्णय गरेको बताउनुभयो ।

उहाँले वाम गठबन्धनले निर्वाचनका बेला जनतामाझ गरेका प्रतिबद्धता पूरा गर्न अब केहीले रोक्न नसक्ने भन्दै त्यसलाई कार्यान्वयन गराउन पनि काँग्रेसले प्रतिपक्षीका हैसियतमा घच्घच्याइरहने छ भन्नुभयो ।

काँग्रेसका सांसद अतहर कमाल मुसलमानले सरकारबाट जनअपेक्षाअनुसारका काम भए नभएको खबरदारीका गर्न पनि काँग्रेस सशक्त प्रतिपक्षीका रुपमा रहने उल्लेख गर्नुभयो ।