काठमाडौँ, १८ फागुन । नेपाल कम्युनिष्ट पार्टीका महासचिव विप्लव विरुद्ध प्रहरीले वारेन्ट जारी गरेको सार्वजनिक भएपछि पार्टीले कडा प्रतिक्रिया दिएको छ । विप्लवको पार्टीले विज्ञप्ति सार्वजनिक गर्दै प्रधानमन्त्री तथा एमाले अध्यक्ष ओली र माओवादी केन्द्रका अध्यक्ष दाहाल विरुद्ध नै पक्राउ पुर्जी जारी गर्ने चेतावनी दिएको छ ।

पार्टीका प्रवक्ता प्रकाण्डले हस्ताक्षर गरेको सो विज्ञप्तिमा सरकारले चोरलाई चौतारा र साधुलाई सुली गर्ने हो भने सबैभन्दा पहिले प्रम ओली र प्रचण्डविरुद्ध वारेन्ट पुर्जी टासिँने उल्लेख गरिएको छ।

‘ओली सरकारले चोरलाई चौतारा र साधुलाई सुली गर्ने हो भने जनयुद्धमा अपराधी सावित भएका जनअपराभीलाई अहिले सञ्चालन भइराखेको जनसत्ताको जनअदालतले कारबाहीको सुरुवात गर्नेछ ।
सबैभन्दा पहिले जनअदालतले वारेन्ट पूर्जी केपी ओलीको घरमा टाँस्नेछ ‘, विज्ञप्तिमा भनिएको छ ।
‘१० वर्षको जनयुद्ध, यसका उपलब्धि, हजारौ जनयुद्धका सहिदको रगत र नेपाली क्रान्तिविरुद्ध अपराध गरी दलाल संसदवादको पुच्छर बनेर हाम्रो पार्टी, क्रान्ति र नेपाली जनताविरुद्ध साम्राज्यवादीको निर्देशनमा दमनमा उत्रने प्रचण्डको घरमा पनि वारेन्ट पूर्जी टाँसिनेछ ।’