काठमाडौं । नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले आफू २०५१ सालमा रक्षामन्त्री बन्दा कडा रूपमा प्रस्तुत भएको बताएका छन्।

मंगलबार काठमाडौँमा आयोजित एक कार्यक्रममा बोल्दै उनले राजा वीरेन्द्रले नचाहँदा पनि आफूले तत्कालीन प्रधानसेनापतिलाई बर्खास्त गरेको दाबी गरे।

‘म लेबनान गएको थिएँ। म त्यहाँ गएको लेबनानमा रहेका नेपाली सेनाका हाकिमहरूले थाहा पाए। उनीहरू मलाई भेट्न आए। किनभने म रक्षामन्त्री थिएँ। रक्षामन्त्री भएपछि प्रधानसेनापतिलाई पनि सञ्चालन गर्नुपर्छ। म कडा रक्षामन्त्री थिएँ,’ नेपालले भने, ‘प्रधानसेनापतिलाई जागिरबाट निकालिदिएँ, भ्रष्टाचार गरेको हुनाले। त्यो बेलामा राजा वीरेन्द्र थिए। वीरेन्द्रले भने एकपटक माफ दिइदिनूस् न त भने। मैले भनेँ( माफी दिन सकिँदैन। यस्ता मान्छेलाई राखेर नेपाली सेनाको इज्जत बढ्न सक्दैन।’

कार्यक्रममा उनले नेपाली विद्यार्थी र युवा पुस्ताले विभिन्न क्षेत्रमा कीर्तिमान कायम गरेको उल्लेख गर्दै नेपाली युवा अध्ययन, अनुसन्धान, खेलकुद लगायत सबै क्षेत्रमा प्रतिभाशाली रहेको बताए ।