ललितपुर । ब्रह्माकुमारी राजयोग सेवा केन्द्र ललितपुर र अधिकृत समाज ललितपुरले ललितपुर जिल्लामा कार्यरत राष्टसेवक कर्मचारीहरुका लागि एक दिने सकारात्मक सोच, सुशासन एवं सिर्जनात्मक जीवन शैली उत्प्रेरणामुलक कार्यक्रम सम्पन्न गरेको छ ।
ब्रह्माकुमारी राजयोग सेवा केन्द्र नेपालका निर्देशक राजयोगिनी डा. राज दादीमाँको प्रमुख आतिथ्यतामा सम्पन्न कार्यक्रमको सभापतित्व प्रमुख जिल्ला अधिकारी तुलसी बहादुर श्रेष्ठले गरेका थिए ।
ब्रह्माकुमारी राजयोग सेवा केन्द्र नेपालका वरिष्ठ राजयोग प्रशिक्षक रामसिंह ऐरले सकारात्मक सोच, सुशासन एवं सिर्जनात्मक जीवन शैलीबारे प्रकाश पारेका थिए ।
कार्यक्रममा प्रशिक्षक तथा उत्प्रेरक ब्रह्माकुमार राजु घलेले प्रस्तुति दिँदै दुःख पीडाको कारक आफै भएकाले समाधान पनि आफै भएको स्पष्ट पारे । उनले शान्ति, खुशी आनन्दलाई भन्दा मानिसहरु धनलाई महत्व दिन कारण पनि सुसंस्कार आवश्यक रहेको बताए ।
देशबासीको सोंच बिग्रिएको र सुसंस्कारको आवश्यकता औंल्याउँदै उनले ‘इलेक्सन’बाट आएकाहरु क्षणिक समयका लागि काम गर्ने र ‘सेलेक्सन’बाट आएकाहरुले जनताको सेवा लामो समय गर्ने भएकाले सकारात्मक सोंचका साथ जनसेवा गर्न कर्मचारीहरुर्लाइ सुझाव दिए ।
कार्यक्रममा जिल्ला अदालत ललितपुरका न्यायाधीश ऋषिराम आचार्यले प्रशिक्षणबाट आफूहरुमा सकारात्मक सोंचको अभिवृद्धि भएको भन्दै कर्मचारीहरुको सेवा प्रवाहमा यस किसिमको कार्यक्रमले महत्वपूर्ण भूमिका खेल्ने बताए ।
ब्रह्माकुमारी राजयोग सेवा केन्द्र ललितपुरले कर्मचारीहरुसँगको सहकार्यमा यस किसिमको कार्यक्रम प्रत्येक वर्ष आयोजना गर्दै आएको छ ।
वर्तमान समयमा बढ्दो मानसिक तनाव व्यवस्थापनका लागि सेवा केन्द्रले राजयोग साधनाद्वारा प्रशिक्षण प्रदान गर्दै आएको छ ।
मनोविकारका कारण दुःख र पीडा दिने मनुष्य आत्मालाई पवित्रता, राजयोगको अभ्यास र दिव्य गुणद्वारा श्रृंगार गर्ने अविभारा सेवा केन्द्रले लिँदै आएको छ ।
बह्माकुमारी राजयोग सेवा केन्द्रले विगत ५० वर्षदेखि नेपालमा सेवा प्रदान गर्दै आएको छ । सेवा केन्द्रहरुबाट नेपालभर ५० हजार भन्दा बढी आत्माले राजयोगको शिक्षा प्राप्त गरेर आफ्नो जीवन सफल गरिरहेका छन् ।
प्रतिक्रिया दिनुहोस्