पोखरा । नेपाल विद्यार्थी संघका नेता तीन विद्यार्थी नेता विभिन्न सरकारी कार्यालयको छाप र जरायोको सिङसहित पक्राउ परेका छन् ।
पक्राउ पर्नेमा पोखरा–१९, पुरनचौर घर भई पोखरा–९ नयाँबजार बस्ने २८ वर्षीय सतिश बास्तोला, चिप्लेढुंगा बस्ने २५ वर्षीय सुजन गिरी र पोखरा ९ बस्ने विवेक श्रेष्ठ छन् । उनीहरू सरकारी छाप कीर्ते गरी नक्कली कागजात बनाउने कार्यमा संलग्न रहेको अनुमान प्रहरीको छ ।
बास्तोला पृथ्वीनारायण क्याम्पस, नेवि संघका पूर्वसभापति एवं नेविसंघ फोर्सका निवर्तमान सभापति हुन् । फागुन १ गते मात्रै बास्तोलाको पदावधि सकिएर नयाँ समिति बनेको थियो ।
पोखरा वडा नं. ९, नयाँबजारमा रहेको ब्लू होम डेकोर नामक पसलमा विभिन्न सरकारी कार्यालयहरु, वडा कार्यालयहरु समेतका छापहरु तथा जंगली जनाबर जरायोको सिङ समेत लुकाई छिपाई राखेको भन्ने गोप्य सूचनाको आधारमा वडा प्रहरी कार्यालय बैदाम र लागू औषध नियन्त्रण व्यूरो शाखा कार्यालय पोखराबाट संयुक्त रुपमा खटिएको प्रहरी टोलीले छापा मारेको थियो ।
सो क्रममा २४ थान छापहरु र जरायोको जस्तो देखिने सिंङ २ थान फेला परेको थियो । छापहरु बनाउन प्रयोग भएको मेसिन थान १, मनिटर थान १, सीपीयू थान १ सहित बरामद गरी तीनै जनालाई पक्राउ गरी कास्की जिल्ला अदालतबाट म्याद थप गरी अनुसन्धान भइरहेको कास्की प्रहरीले जानकारी दिएको छ ।
प्रतिक्रिया दिनुहोस्