काठमाडौं, २२ माघ । संयुक्त राष्ट्रसंघीय बिशेष दूत फिलिपे गोन्जालेज मोरालेसले वैदेशिक रोजगारमा जाने कामदारसँग शुल्क लिने र शोषण गर्नेमाथि शून्य सहनशिलताको नीति लिनुपर्ने बताउनुभएको छ ।

वैदेशिक रोजगारमा जाने नेपाली कामदारको मानव अधिकारको पक्षमा नेपालले चालेका कदमको अध्ययन गर्न आएका बिशेष दूत मोरालेसले सोमबार ललितपुरमा पत्रकार सम्मेलन गरी यस्तो बताउनुभएको हो ।

उहाँले नेपालले कामदारलाई शून्य लागतमा पठाउने नीतिको प्रभावकारी कार्यान्वयन गर्नुपर्ने समेत बताउनुभयो । उहाँले ७ वटा प्रमुख गन्तव्य देशमा शून्य लागतमा कामदार पठाउन लिएको नीतिलाई कमजोर रुपमा लागू गर्नुको साथै यसको अनगुमन प्रभावकारी नभएको धारणा पनि राख्नुभयो ।

कामदारसँग विभिन्न शिर्षकमा शूल्क लिने कार्यलाई पूर्णरुपमा प्रतिबन्ध गरिनुपर्ने भन्दै उहाले विभिन्न क्षेत्र र सीपमा काम गर्न जाने कामदाराको करारपत्र गुणस्तरीय बनाउनुपर्नेमा जोड दिनुभयो ।

मोरालेसले गन्तव्य देश जानुभन्दा अगाडिको पूर्व तयारी तालिमलाई सुधार र वृद्धि गर्नुपर्ने बताउदै सरकारले श्रम मन्त्रालय, वैदेशिक रोजगार विभागको कार्यक्षमता बढाउनका लागि आवश्यक बजेट व्यवस्था गर्नुपर्ने बताउनुभयो । ८ दिने भ्रमण सकेर उहा सोमबार नै राष्ट्र संघ फर्कनुभएको छ ।