काठमाडौं १७ चैत । नेपाली कांग्रेसको डा. शेखर कोइराला समूहले सरकारमा आफ्नो पक्षको सहभागिता सम्मानजनक नभएसम्म मन्त्रीको नाम नदिने अडान लिएको छ ।

सत्ता गठबन्धनमा कांग्रेसले ८ मन्त्रालय पाएको छ । सभापति शेरबहादुर देउवाले शेखर समूहलाई दुई मन्त्रीको नाम दिन भनेका छन् । शेखर समूहले भने यो प्रस्ताव स्वीकार्य नहुने बताएको छ । कोइराला समूहको माग कम्तीमा ३ वटा मन्त्रालय पाउनु पर्ने रहेको छ ।

शुक्रबार बिहान बसेको शेखर कोइराला र उनको समूहका पदाधिकारीहरुको बैठकले सम्मानजनक सहभागिता नभएसम्म मन्त्रीहरुको नाम नदिने निर्णय गरेको छ ।

‘यो हामीले सभापतिलाई पनि भनेका छौं, प्रधानमन्त्री प्रचण्डलाई खबर गरेका छौं’, सहमहामन्त्री जीवन परियारले भने ।
यस अघि कोइराला समूहबाट मोरंगबाट निर्वाचित डिग बहादु लिम्वु र उपसभापति धनराज गुरुंग मन्त्री हुने चर्चा थियो ।
प्रधानमन्त्रीले दिउंसो ३ बजेका लागि नवनियुक्तिको सपथ ग्रहणका लागि राष्ट्रपतिसंग समय लिएका छन् ।