काठमाडौँ, १५ चैत । सत्तारूढ गठबन्धनको बैठक आज पनि बस्दै छ । बुधबार बिहान ९ बजे प्रधानमन्त्रीको सरकारी निवास बालुवाटारमा गठबन्धन बैठक बस्दे तय भएको छ ।

मन्त्रालय भागबन्डा र सरकारका न्यूनतम साझा कार्यक्रमबारे बैठकमा छलफल हुने छ ।

मंगलबार साँझ पनि बालुवाटारमा बगठन्धनको बैठक बसेको थियो । बैठकमा प्रधानमन्त्री पुष्पकमल दाहाल ‘प्रचण्ड’ले सरकारका न्यूनतम साझा कार्यक्रमको मस्यौदा छलफलका लागि पेस गरेका थिए ।

न्यूनतम साझा कार्यक्रमको मस्यौदामा समावेश गरिएका विषयवस्तु अध्ययन गरी थपघट गर्न आज पुनः बैठक बस्दै छ । साथै मन्त्रालय भागबन्डाबारे पनि दलहरू सहमतिमा पुग्न छलफल गर्ने तयारीमा छन् ।

कसले कति मन्त्रालय लिने भन्ने सहमति नहुँदा मन्त्रिपरिषद् विस्तारमा ढिलाइ भएको छ । दलहरूले आफूहरूले पाउनुपर्ने मन्त्रालय संख्या दाबी गरिसकेका छन् ।

नेपाली कांग्रेसलाई ८, नेकपा (माओवादी केन्द्र)लाई ५, राष्ट्रिय स्वतन्त्र पार्टीलाई ३, नेकपा (एकीकृत समाजवादी)लाई २, जनता समाजवादी पार्टीलाई २, जनमत पार्टीलाई १, नागरिक उन्मुक्ति पार्टीलाई १, लोकतान्त्रिक समाजवादी पार्टीलाई १ मन्त्रालय साथै स्वतन्त्रबाट १ जनालाई मन्त्री बनाउने प्रस्ताव प्रधानमन्त्रीले राखेका थिए ।

सो प्रस्तावमा दलहरूले आ–आफ्नो दाबी राखेका थिए । यसबारे आज थप छलफल गरी सहमतिमा पुग्ने दलहरूले बताएका छन् ।

प्रधानमन्त्री प्रचण्डले गत चैत ६ मा दोस्रोपटक विश्वासको मत लिएका थिए । मन्त्रालय भागबन्डा नमिल्दा प्रधानमन्त्रीले १६ मन्त्रालय हेर्दै आएका छन् ।