काठमाडौं, १२ चैत। नेपाली कांग्रेसका नेता डा। शेखर कोइरालाले मुलुक गम्भीर बिरामी अवस्थामा रहेको बताएका छन् । आइतबार प्रतिनिधिसभा बैठकमा बोल्दै उद्यम गर्नेहरु हतास मनस्थितिमा देखिएको, कर तिर्नेहरु निराश रहेको, व्यापारिक शहरहरु उजाड देखिएको भन्दै मुलुक गम्भीर बिरामी भएको बताएका हुन् ।
‘मैले कर तिर्ने बर्ग निराश भएको पाएँ, यहीँ उद्यम गरेर टिक्न खोज्नेहरु हतास मनसिस्थतिमा रहनु हाम्रो राष्ट्र सिकिस्त बिरामी भएको अवस्था हो’, उनले भने, ‘सबैको ब्यापार घटेको छ । ब्यापार घटेपछि उद्योगको उत्पादन घट्नु सामान्य हो । ब्यापारिक शहर उजाड हुँदैछन् । भर्खरै प्राप्त जनगणना अनुसार काम गर्ने उमेरका एक तिहाइ नेपाली केही पनि आर्थिक उपार्जन गर्दैनन् । यो भन्दा भयावह परिस्थिति के हुन सक्ला ?’
संघीयताप्रति वितृष्णा चुलिँदो रहेको भन्दै नेता कोइरालाले यो राजनीतिक असफलताको पहिलो खुट्किलो भएको बताए । उनले अब ढिलो नगरी नागरिकको चाहना अनुसार संसद, सरकार र प्रतिपक्षी दलहरु एक ठाउँमा उभिनुपर्ने धारणा राखे । कोरोना महामारी र विश्वमा फरक शैलीमा आएको शीतयुद्ध र हाम्रो अर्थतन्त्रमा गर्नुपर्ने सुधारको कमीका कारण अर्थतन्त्रले गति लिन नसकेको भन्दै उनले अत्यधिक फजुल खर्चले अर्थतन्त्र समस्यामा रहेको पनि बताए । ‘अर्थतन्त्रको मुख्य आधार विप्रेषण मात्र भएको छ ।
यसले हाम्रो अर्थतन्त्र जोगाएको मात्र छैन, श्रीलंका र पाकिस्तानतिर जान पनि रोकिरहेको छ’ उनले भने, ‘विप्रेषणको माध्यमबाट चीरकालसम्म जोगाउन सम्भव छैन ।’ चालु आर्थिक वर्षको चैत ११ गतेसम्म सरकारको खर्च र आम्दानीमा झण्डै २ सय अर्बको खाडल देखिएको भन्दै कोइरालाले पुँजीगत खर्च मात्र नभई चालु खर्चकै लागि ऋण लिनुपर्ने बाध्यता रहेको सुनाए । ‘देशको सबल अर्थतन्त्रका लागि फजुल खर्च घटाउन समयम समयमा बनेका प्रतिवेदन कार्यान्वयन गर्न राजनीतकि सहमति कायम गरेर अघि बढौं’ उनले भने । अर्थतन्त्र चलायमान बनाउन निजी क्षेत्रको विश्वास जित्न जरुरी रहेको पनि कोइरालाले बताए ।
प्रतिक्रिया दिनुहोस्