काठमाडौँ, १० चैत । राष्ट्रपति र उपराष्ट्रपतिको चुनाव सकेर संसद्‌बाट विश्वासको मत लिएलगत्तै मन्त्रिपरिषद् विस्तार गर्ने बताएका प्रधानमन्त्री पुष्पकमल दाहाल ‘प्रचण्ड’ले अझै सरकार विस्तार गर्न सकेका छैनन् ।

चैत ६ गते दोस्रोपटक संसद्‌मा विश्वासको मत लिएका प्रधानमन्त्री प्रचण्डले सत्ता गठबन्धनको संयुक्त बैठकसमेत राख्न सकेका छैनन् । प्रचण्डले बुधबार र बिहीबार गठबन्धनका केही नेतासँग छुट्टाछुट्टै छलफल गरेका छन् । बिहीबार पनि उनले नेपाली कांग्रेसका सभापति शेरबहादुर देउवासहित शीर्ष नेताहरूसँग बालुवाटारमा छलफल गरे । सत्ता गठबन्धनका १० दललाई मन्त्रालयको बाँडफाँड मिलाउन प्रचण्डलाई सकर परेको छ ।

सत्ता गठबन्धनको ठुलो दल कांग्रेसका नेताहरू संसद्‌मा रहेको सिट संख्यालाई आधार मानेर मन्त्रालय बाँडफाँड गर्नु पर्ने पक्षमा छन् । तर, सहमतिका लागि लचक रहेको कांग्रेस नेताहरूको तर्क छ ।

ठुलो दलको हैसियतले आफूहरूलाई सम्मानपूर्वक सरकारमा समावेश गर्न प्रधानमन्त्री र गठबन्धनका नेताहरू सचेत रहेको नेपाली कांग्रेसका प्रमुख सचेतक रमेश लेखकको दाबी छ ।

यद्यपि, गठबन्धनका सबै दल सकारात्मक रहेकाले अबको एक साताभित्र प्रधानमन्त्रीले मन्त्रिपरिषद्लाई पूर्णता दिइसक्ने कुरामा माओवादी केन्द्रका सचिव देवेन्द्र पौडेल ढुक्क छन् । “प्रधानमन्त्रीलाई सबै दलले निकै सकारात्मक हिसाबले क्याबिनेट विस्तारको एउटा मोडालिटी बनाउनुस्, प्रस्ताव गर्नुुस् र एक–दुई दिनमा बसौँ भनेर हिजो मात्रै कुरा गरेका छन् । यो हप्ता सकिन २ दिन बाँकी छ । अब आउने हप्ता मन्त्रिपरिषद् विस्तार हुन्छ,” उनले भने ।

मन्त्रिपरिषद्ले पूर्णता नपाउँदै गठबन्धनका मुख्य दलले सरकारको साझा कार्यक्रमका विषयमा पनि छलफल थालेका छन् । बिहीबारै कांग्रेस, माओवादी र राष्ट्रिय स्वतन्त्र पार्टीका नेताहरू साझा कार्यक्रमबारे छलफल गरेका हुन् ।