काठमाडौँ, २१ फागुन । सरकारले मुस्ताङमा विश्वविद्यालय स्थापना गर्नका लागि भारतीय दूतावासमा गरिएको पत्राचारबारे छानबिन गर्ने भएको छ । सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले आइतबार विज्ञप्ति जारी गर्दै यरबारे आवश्यक छानबिन हुने र तथ्य सार्वजनिक गर्ने स्पष्ट पारेकी हुन् ।

“मुस्ताङको बारागुङ मुक्तिक्षेत्र गाउँपालिकाले कलेज स्थापनाका लागि सहयोग गर्न अनुरोध गर्दै भारतीय दूतावासमा पत्र लेखेको भन्ने समाचार सार्वजनिक भएकाले यस सम्बन्धमा के भएको हो सो को अध्ययन र आवश्यक छानबिन गरी सत्य तथ्य सार्वजनिक गर्ने व्यहोरा जानकारी गराउन चाहन्छौँ,” प्रवक्ता शर्माद्वारा जारी विज्ञप्तिमा छ ।
उक्त क्षेत्रमा चीनलाई लक्षित गरी भारतले विश्वविद्यालय खोल्न लागेको समाचार प्रकाशित भएको थियो । शनिबार एमाले पार्टी कार्यालयमा आयोजित एक कार्यक्रममा एमाले अध्यक्ष केपी शर्मा ओलीले भारतलाई विश्वविद्यालय खोल्न दिएर प्रधानमन्त्री पुष्पकमल दाहाल‘प्रचण्ड’ले चीनविरूद्ध गद्दारी गरेको बताएका थिए ।

मन्त्री शर्माले उक्त ठाउँमा विश्वविद्यालय खोल्न सहयोग गर्न भन्दै भारतीय दूतावासमा पत्र लेखिएको भनी समाचार आएकाले यस विषयमा अनुसन्धान भइरहेको उल्लेख गरेकी छन् ।

“सम्माननीय प्रधानमन्त्री र नेपाल सरकारलाई आक्षेप लगाउने गरी तथ्यहीन रूपमा यस्ता विषय श्रृंखलावद्ध रूपमा सार्वजनिक हुनु दुःखद् छ,” मन्त्री शर्माले जारी गरेको विज्ञप्तिमा भनिएको छ,“परराष्ट्र नीतिमाथि आँच पुर्‍याउने गरी यस्ता अभिव्यक्ति आउनु उपयुक्त होइन ।”