काठमाडौँ, १५ फागुन । राष्ट्रपति निर्वाचनलाई लक्षित गर्दै ८ दलले कार्यदल बनाएका छन् । आइतबार प्रधानमन्त्री निवास बालुवाटारमा बसेको बैठकले राष्ट्रपति चुनावको तयारीका लागि कार्यदल गठन गरेको हो ।

कार्यदल संयोजकमा नेपाली कांग्रेसका उपसभापति पूर्णबहादुर खड्का छन् । ८ दलबाट एक–एक जना रहने गरी कार्यदल बनाइएको हो । कार्यदलमा रहेका सदस्यले राष्ट्रपति निर्वाचनमा आ–आफ्नो पार्टीको जिम्मा लिनुपर्ने भनिएको छ ।

नेकपा (माओवादी केन्द्र)बाट महासचिव देवप्रसाद गुरूङ, जनता समाजवादी पार्टीबाट शरतसिंह भण्डारी, नागरिक उन्मुक्ति पार्टीबाट अध्यक्ष रञ्जिता श्रेष्ठ चौधरी र जनमोर्चाबाट अध्यक्ष चित्रबहादुर केसी कार्यदल सदस्य रहेका छन् ।

यही फागुन २५ गते राष्ट्रपति निर्वाचन हुँदै छ । राष्ट्रपति निर्वाचनमा संघीय संसद्का सदस्य र प्रदेशसभा सदस्य मतदाता हुन्छन् । ८ दलले नेपाली कांग्रेसका वरिष्ठ नेता रामचन्द्र पौडेललाई उम्मेदवार बनाएका छन् भने नेकपा (एमाले)ले उपाध्यक्ष सुवासचन्द्र नेम्मवाङलाई राष्ट्रपतिमा उम्मेदवार बनाएको छ ।