काठमाडौँ, १३ फागुन । राष्ट्रपतिको निर्वाचनमा ८ दलले नयाँ गठबन्धन बनाएका छन् । गठबन्धन चुनावको दिनसम्म नभत्केमा यसबाट उठेका उम्मेदवारको पक्षमा स्पष्ट बहुमत पुग्ने देखिएको छ । शुक्रबार बनेको गठबन्धनमा नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा), लोकतान्त्रिक समाजवादी पार्टी (लोसपा), जनमत पार्टी, राष्ट्रिय जनमोर्चा र नागरिक उन्मुक्ति पार्टी छन् ।

यी दलका सांसदहरूको मतभार जोड्दा स्पष्ट बहुमत पुग्ने छ । राष्ट्रपति निर्वाचनमा प्रदेशसभा, प्रतिनिधिसभा र राष्ट्रियसभाका सांसदहरू मतदाता हुन्छन् ।

निर्वाचन अधिकृतको कार्यालयले जारी गरेको अन्तिम नामावलीअनुसार राष्ट्रपति निर्वाचनमा ८८२ जनाले मत दिन पाउनेछन् । जसमा ५५० प्रदेशसभा सदस्य र ३३२ संघीय सांसद रहने छन् । ३३४ संघीय सांसदमध्ये दुईजनाले मतदानमा भाग लिने छैनन् । रवि लामिछानेको निर्वाचन क्षेत्र चितवन–२ मा रिक्त रहेको छ भने कांग्रेस सांसद टेकबहादुर गुरूङ निलम्बित अवस्थामा छन् ।

राष्ट्रपति तथा उपराष्ट्रपति निर्वाचनसम्बन्धी ऐन, २०७४ को दफा ५४ बमोजिम संघीय सांसदको मतभार ७९ र प्रदेशसभा सांसदको मतभार ४८ रहेको छ ।

मतदाता रहेका कुल सांसदहरूको मतभार ५२ हजार ६२८ छ । त्यसको ५० प्रतिशत मत कटाउने निर्वाचित हुन्छन् । त्यसैले निर्वाचित हुनका लागि न्यूनतम २६ हजार ३१५ मत आवश्यक पर्छ । शुक्रबार बनेको गठबन्धनको पक्षमा रहेका सांसदहरूको मतभार ३१ हजार ९१७ हुन्छ । त्यसैले यो गठबन्धना चुनावको दिनसम्म नभत्केमा यसैबाट बनेका उम्मेदवार राष्ट्रपति बन्ने निश्चित हुन्छ ।

सत्तारूढ दल माओवादी केन्द्रसहित ८ दलले राष्ट्रपतिमा कांग्रेसलाई समर्थन गर्ने निर्णय गरेका छन् ।

आठ दलसँग कति छ मतभार ?

नेपाली कांग्रेस– १६ हजार १४२
नेकपा (माओवादी केन्द्र)– ७ हजार ६४९
नेकपा (एकीकृत समाजवादी)– २ हजार ५७४
जनता समाजवादी पार्टी– २ हजार १४५
जनमत पार्टी– १ हजार २४२
लोकतान्त्रिक समाजवादी पार्टी–९७१
नागरिक उन्मुक्ति पार्टी– ८९२
राष्ट्रिय जनमोर्चा– २०६

अन्य दलसँग कति ?
नेकपा (एमाले)– १५ हजार २८१
राष्ट्रिय प्रजातन्त्र पार्टी– २ हजार ४५०
राष्ट्रिय स्वतन्त्र पार्टी– १ हजार ५०१
नेपाल मजदुर किसान पार्टी– २२३
संघीय समाजवादी– ४८
हाम्रो नेपाली पार्टी–९६
स्वतन्त्र–८१३
मनोनीत– २३७