काठमाडौँ, १२ फागुन । राष्ट्रपति पदको साझा उम्मेदवार चयन गर्न सक्रिय राजनीतिक दलका शीर्ष नेताहरूको आज निर्णायक वार्ता हुँदै छ । सरकारको नेतृत्वकर्ता दल नेकपा (माओवादी केन्द्रंका अध्यक्ष एवम् प्रधानमन्त्री पुष्पकमल दाहाल ‘प्रचण्ड’ले आज नेकपा (एमाले)का अध्यक्ष केपी शर्मा ओलीसँग वार्ता गर्ने छन् । त्यसअघि नेपाली कांग्रेससँग पनि वार्ताको तयारी छ ।

जनता समाजवादी पार्टी (जसपा) नेता राजेन्द्र श्रेष्ठका अनुसार आज बिहान नेपाली कांग्रेस, माओवादी केन्द्र, नेकपा (एकीकृत समाजवादी) र जसपाको संयुक्त बैठक बस्ने तयारी भइरहेको छ । बिहीबार माओवादी केन्द्र, एकीकृत समाजवादी र जसपाको संयुक्त बैठक बसेको थियो । सोही बैठकले आज कांग्रेससँग पनि वार्ता गर्ने सहमति गरेको हो । आजको बैठकले कांग्रेस नेतृत्वको पाँच दलीय गठबन्धन ब्युँताउने तयारीलाई औपचारिकता दिने नेताहरू बताउँछन् ।

कांग्रेससहितको बैठक राष्ट्रपतिको साझा उम्मेदवार चयन गर्ने र पुरानो सत्ता गठबन्धन ब्युँताउने विषयमा केन्द्रित हुने अर्का एक नेताले बताए । २७ गते हुने राष्ट्रपति पदनको निर्वाचनका लागि १३ गते मनोनयन दर्ताको कार्यक्रम रहेकाले दलहरू आजै साझा उम्मेदवार टुंगो लगाउने प्रयासमा छन् ।

प्रधानमन्त्री प्रचण्डले आज दिउँसो एमाले अध्यक्ष ओलीसँग पनि भेटवार्ता गर्ने भने पनि त्यो औपचारिकतामा मात्र सीमित हुने सम्भावना छ । एमाले अध्यक्ष ओलीले अहिलेको सत्ता गठबन्धन तोडिने संकेत गरिसकेको छन् । उनले एमालेसमेत वर्तमान सरकारले फागुन १ गते जनयुद्ध दिवसको दिन सार्वजनिक बिदा दिने भनेर गरेको निर्णय गलत भएको सार्वजनिक टिप्पणी गरिसकेका छन् ।