एजेन्सी, ९ फागुन । ७.८ म्याग्निच्युडको शक्तिशाली भूकम्प गएको दुई सातापछि टर्कीमा पुनः शक्तिशाली भूकम्प गएको छ । दक्षिणी टर्कीको हतय प्रान्तलाई केन्द्रबिन्दु बनाएर सोमबार ६.३ म्याग्निच्युडको भूकम्प जाँदा कम्तिमा ३ जनाको मृत्यु भएको छ ।
भूकम्पमा परी सयौँ घाइते भएको टर्कीको विपद् तथा आकस्मिक व्यवस्थापन संस्था एएफएडीले जनाएको छ । टर्कीका अधिकारीहरूले सोमबारको भूकम्पमा परी २९४ जना घाइते भएको बताएका छन् । उक्त भूकम्पपछि दर्जनौँ पराकम्पनहरू गइरहेको त्यहाँका अधिकारीले जनाएका छन् ।
भूकम्प गएको हतय प्रान्त सिरियाको नजिकै रहेको अन्तर्राष्ट्रिय सञ्चारमाध्यमले उल्लेख गरेका छन् ।
टर्की र सिरियाका अधिकारीका अनुसार दुई साताअघि गएको ७.८ म्याग्निच्युडको शक्तिशाली भूकम्पमा परी मृत्यु हुनेहरूको संख्या ४६ हजार नाघेको छ ।
प्रतिक्रिया दिनुहोस्