चितवन, ५ फागुन । सहरी विकासमन्त्री विक्रम पाण्डेले निर्माण व्यवसायीहरूमा एकता र एकरुपताको खाँचो रहेको बताएका छन् । निर्माण व्यवसायी संघ चितवनको २९औँ वार्षिक साधारणसभामा उनले व्यवसायीलाई एक भएर समयमा राम्रो काम गर्न निर्देशन दिए ।

व्यवसायी एकजुट हुन नसक्दा निर्माण व्यवसायीको समस्या समाधान हुन नसकेको बताउँदै उनले अहिले साना व्यवसायीमा समस्या देखिएको बताए । उनले भने, “महासंघले सबै व्यवसायीलाई साना–ठुला सबैलाई समानरूपमा हेर्नुपर्छ ।”

समयमा गुणस्तरीय काम गरे राज्यले सहयोग गर्ने विश्वास दिलाउँदै उनले व्यवसायीलाई भने, “गुणस्तरीय काम गर्नुहोस्, समयमा काम सक्नुहोस् र कसैसँग नझुक्नुस् ।” नेपालमा देखिएको आर्थिक समस्यालाई सन्तुलन राख्नका लागि व्यवसायी र सरकार एक ठाउँमा बसेर संकट समाधान गर्नुपर्ने उनको भनाइ थियो । उनले भने, “तपाईँहरू नथाक्नुहोस्, अहिले थाक्ने समय होइन ।”

कार्यक्रममा बागमती प्रदेश आर्थिक मामिला तथा योजनामन्त्री जगन्नाथ थपलियाले व्यवसायी आत्तिनुपर्ने अवस्था नरहेको बताए । विश्वमा देखिएको आर्थिक मन्दीको असर नेपालमा पनि देखिएको बताउँदै उनले प्रदेश सरकारले चालु पुँजीमा ३० प्रतिशत कटौती गरेको जानकारी दिए ।

निर्माण व्यवसायी महासंघका अध्यक्ष रवि सिंहले सार्वजनिक खरिद ऐनलाई सबैले स्वीकार गर्नुपर्ने बताए । सरकारले हरेकपटक ऐन परिवर्तन गर्दा आफूखुसी गर्ने भएकाले समस्या बढ्दै गएको उनको भनाइ छ । कोभिड र रुस–युक्रेनको युद्वका कारण निजी क्षेत्रमा प्रत्यक्ष प्रभाव परेको उनले बताए ।