काठमाडौं ८ माघ । नेपाली कांग्रेसका नेता शेखर कोइरालाले प्रधानमन्त्री पुष्पकमल दाहाल प्रचण्डलाई विश्वासको मत दिवएर गल्ती गरेको स्वीकार गरेका छन् ।

संस्थापनइतर पक्षका नेताहरूसँगको बैठकमा बोल्दै नेता कोइरालाले विश्वासको मत दिएर पार्टीले गल्ती गरेको बताएका हुन् ।

आफूले तटस्थ बसौ भनेर प्रस्ताव राखेको तर सुनुवाइ नै नगरी बहुमतले निर्णय गरेर प्रधानमन्त्रीलाई विश्वासको मत दिन सभापतिजीलागेको कोइरालाको आरोप छ ।

‘प्रधानमन्त्रीलाई विश्वासको मत दिनु हुन्थेन। दिएर गल्ती गरियो। तटस्थ बसौ भनेर मैले प्रस्ताव राखेको थिएँ’, उनले थपे, ‘कार्य सम्पादन समितिमा मैले राखेको प्रस्तावको सुनुवाइ भएन । बहुमतले विश्वासको मत दिने निर्णय गरेपछि त्यसलाई मान्नु पर्ने बाध्यता भयो।’

सभापति शेरबहादुर देउवाको प्रस्तावमा कांग्रेस केन्द्रीय कार्यसमिति बैठकले प्रधानमन्त्री प्रचण्डलाई विश्वासको मत दिने निर्णय गरेको थियो ।

कांग्रेसका महामन्त्रीद्वय विश्वप्रकाश शर्मा र गगन थापालगायत चार जना नेताले विश्वासको मत दिने निर्णयमा नोट अफ डिसेन्ट लेखेका थिए । तर मतदानमा भने उनीहरु सहभागी भएका थिए ।

अन्तरघातीको खोजी
कोइराला समूहको बैठकमा नेताहरुले संसदीय दलमा आफ्नो समूहको मत एकीकृत हुन नसक्नुको कारण खोजेका छन् ।

संसदीय दलको नेताको चुनावमा आफ्नो समूहका उम्मेदवार गगन थापाले समूहकै मत पनि नपाएको विषय उठाउँदै नेताहरूले त्यसको कारण खोजेका हुन् ।

बैठकमा सहभागी भएका एक नेताले प्रश्न गरे, ‘टिममा भोट त आउनुपर्ने हो । कि टिम भन्दै हिँड्नु भएन । टिमको नेता क्लियर हुनुपर्छ । अन्तिम समयसम्म हाम्रो टिमको उम्मेदवार किन चयन गर्न सकेनौं ?

नेता चन्द्र भण्डारीले निर्वाचनमा गठबन्धन बनाएपनि सरकार बन्ने बेला गठबन्धन किन टुट्यो, कमजोरी कहाँ भयो ? भन्ने समीक्षा भएको बताए । ‘सरकारलाई किन विश्वासको मत दियौँ ? कांग्रेस किन कन्फ्युजनमा ? स्पष्ट दृष्टिकोण किन हुन सकेन ? यस्तै प्रश्नसहितका धारणा नेताहरूले राख्नुभयो’, भण्डारीले भने, ‘अव कांग्रेस प्रमुख प्रतिपक्षमा बस्ने वा राष्ट्रपति पाउँछ कि पाउँदैन भनेर हिँड्ने ? यसबारे पार्टीको लाइन प्रस्ट हुनुपर्छ भन्ने मत आएको छ ।’

उनले पार्टीभित्र पनि विचारका दोकानहरू धेरै भएको भन्दै आगामी दिनमा सदन र केन्द्रीय समिति बैठकमा एकमतका साथ प्रस्तुत हुनुपर्नेमा नेताहरूको भनाइ आएको बताए ।

‘१० गते बिहान सदनमा जानुअघि एउटा धारणा बनाउँछौँ  । छलफल बल्ल सुरु भएको छ । विश्वासको मत दिएर गल्ती गरियो भन्ने आउटपुट आउदैछ । माओवादीलाई ढोका बन्द गर्नु हुदैन थियो भन्ने तर्क पनि आएको छ’, भण्डारीको भनाइ छ ।

६ पुसमा भएको संसदीय दलको चुनावमा सभापति देउवा ६४ मतका साथ संसदीय दलको नेता चुनिदा गगन थापाले जम्मा २५ मत मात्रै पाएका थिए । कोइराला समूहको दावी ३१ जना दलमा रहको भन्ने छ । थापालाई महामन्त्री विश्वप्रकाश शर्मा र अर्का युवा नेता प्रदीप पौडेलसमेतले समर्थन गरेका थिए ।
पछिल्लो राष्ट्रिय राजनीति र पार्टीभित्रको आन्तरिक विषयमा छलफल गर्न कोइरालापक्षको बैठक  बत्तीसपुतलीमा भएको छ ।