काठमाडौं १० पुस । नेपाली कांग्रेसका वरिष्ठ नेता रामचन्द्र पौडेलले आइतबार बालुवाटारमा बसेको बैठकपछि सत्तारुढ गठबन्धन टुटेको बताएका छन् । गठबन्धनमा सहमति हुन नसकेपछि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले ‘अब गठबन्धनको औचित्य सकियो’ भन्दै बैठक स्थल छाडेको जानकारी दिएका हुन् ।

‘हामीले गठबन्धन जोगाउन सकेनौँ । अब हाम्रो हातमा केही रहेन,’ पौडेलले रातोपाटीलाई भने । पौडेलले यसअघि गठबन्धनलाई जोगाउन आफै दौडधुप गर्दै आएका थिए । गठबन्धनमा पहिलो पालीमा कसले पहिले सरकारको नेतृत्व गर्ने विषयमा विवाद रहेको थियो । नेपाली कांग्रेस र नेकपा माओवादी केन्द्र दुवैले आफूले पहिले सरकारको नेतृत्व गर्न पाउनुपर्छ भन्दै आइरहेका थिए ।

यता बैठकपछि नेपाली कांग्रेसका नेता तथा सरकारका प्रवक्ता समेत रहेका मन्त्री ज्ञानेन्द्रबहादुर कार्कीले भने प्रधानमन्त्री शेरबहादुर देउवा अझै पनि गठबन्धन जोगाउने पक्षमा रहेको बताए । उनले दलहरु पुनः छलफलमा बस्ने बताए पनि समय भने बताउन सकेनन् ।

यसैबीच प्रधानमन्त्री र राष्ट्रपति दुवै कांग्रेसले लिए नेकपा माओवादी केन्द्र प्रतिपक्षमा बस्ने निर्णय गरेको माओवादी केन्द्रका अध्यक्ष प्रचण्ड र नेका सभापति देउवाबीचको छलफल असफल भएको छ । नेकाले दुवै पद छाड्न नमानेपछि प्रचण्ड बालुवाटारबाट बाहिरिएका हुन् ।
स्रतका अनुसार राजधानीमा रहेको एकजना एमाले कार्यकर्ताको घरमा ओलीले प्रचण्डलाई कुरिरहेका थिए । प्रचण्ड त्यहीं पुगेका छन्। विहानै देखि नारायणकाजी श्रेष्ठ र देव गुरुंग तथा सुवास नेम्वांग र विष्णु पौडेल सम्भावित वाम गठबन्धनको तयारीका लागि जुटिरहेका छन् ।

सरकार निर्माणबारे बालुवाटारमा प्रचण्डले प्रधानमन्त्री तथा नेपाली कांग्रेसका सभापति शेरबहादुर देउवासँग बटम लाइन बताउन भनेपछि दुवै पद नछाड्ने बरु थप १ प्रदेशको मुख्यमन्त्री दिने बताएपछि प्रचण्डले देउवालाई धोकेवाज भन्दै बाहिरिएका हुन् ।
एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनाल नि प्रचण्ड र देउवाको बैठकमा सहभागी भएका थिए । प्रचण्ड बाहिरिएको केही समयपछि माधव नेपालले आफू नेकासंगे रहने बचन दिएर दुवै जना बाहिरिएका छन् । सत्तारुढ गठबन्धनको अन्तिम बैठक समेत हुन नसक्ने भएको छ ।

सम्वन्धित समाचार

शनिबार दिनभर गठबन्धनको गन्जागोल दौड, रातभर मन्त्रणा, आज विहानैदेखि फेरि बालुवाटार, बालकोट र खुमलटार सक्रिय