काठमाडौं । काठमाडौंको सबैभन्दा नजिकै रहेको चन्द्रागिरी केबलकार चढेका सेवाग्राहीहरुको बुधबारको यात्रा सकसपूर्ण रह्यो । कतिपय केवलकारमै साढे ५ घण्टा बढी विताउनुपर्यो भने कतिपय चन्द्रागिरी डाँडामै घण्टौं बस्न बाध्य भए ।
काठमाण्डौंको चन्द्रागिरी नगरपालिका–४ स्थित चन्द्रागिरी हिल्स प्रालिको केबलकारमा करिब २ बजे प्राविधिक समस्या आएको थियो ।
त्यसबारे जानकारी प्रहरीले १ः४० बजे पाएको थियो । सो केवलकारमा सवार थिए राष्ट्रियसभाका अध्यक्ष गणेश तिमिल्सिना । अध्यक्ष तिमिल्सिनासहित १४० जना केवलकारबाट चन्द्रागिरीतर्फ जाँदै गर्दा केवलकारमा समस्या आएको थियो ।
केबल कारमा अड्किएकाहरुको प्रहरी र केवलकार अपरेटर समेतले केवलकारको इमर्जेन्सी लाइन प्रयोग गरी उद्दार गरिएको थियो ।
चन्द्रागिरी डाँडामा पुगेका ४७० जना मानिसहरुको समेत ५ घण्टा लगाएर उद्दार गरिएको थियो ।
डाँडामा पुगेकाहरुलाई प्रहरीले प्रहरीकै गाडी, केवलकारको गाडी प्रयोग गरी थानकोट झारिएको थियो ।
लामो समयसम्म केबलकार रोकिँदा धेरै मानिस आत्तिएका देखिएको उद्दारमा खटिएका प्रहरीहरुले बताएका छन् ।
चन्द्रागिरी डाँडा पुगेको १७० भन्दा बढी मानिसलाई प्रहरीले हिडाउँदै चित्लाङ डाँडा पुर्याएको र गाडीबाट उद्दार गरिएको प्रहरीले जनाएको छ ।
प्रहरी वृत्त थानकोटसहित प्रहरी परिसर काठमाडौं लगायतको डेढ सयभन्दा बढी प्रहरी टोली उद्दारमा खटिएको एसपी दिनेशराज मैनालीले जानकारी दिए ।
केबलकारमा अड्किएका र डाँडामा पुगेर विचल्लीमा परेका मानिसको उद्दारसँगै राति ८ बजेपछि केबलकार सञ्चालनमा आएको छ ।
प्रतिक्रिया दिनुहोस्