काठमाडौँ, ३० बैशाख । पूर्वप्रधानमन्त्री झलनाथ खनालले स्थानीय तह निर्वाचन नेतृत्वलाई नविकरण गर्ने अवसर रहेको बताउनुभएको छ ।

सूर्योदय नगरपालिका-९ रम्फोकस्थित राष्ट्रिय आधारभुत विद्यायबाट मतदानपछि सञ्चारकर्मीसँग प्रतिक्रिया दिँदै खनालले नेपालमा लोकतन्त्र कलिलो अवस्थामा रहेकाले संविधानको रक्षा र मुलुकलाई स्थायित्व प्रदान गर्नका लागि मतदान अपरिहार्य रहेको बताउनुभयो । अघिल्लो निर्वाचनबाट देशमा स्थायित्वको अपेक्षा गरिए पनि गलत नेतृत्वका कारण सफल हुन नसकेको खनालको भनाइ छ । अबको निर्वाचनले मुदुकलाई स्थायित्व दिँदै समाजवादको आधार तयार पार्ने उहाँले बताउनुभयो ।

त्यस्तै, नेकपा (एमाले) का नेता तथा पूर्वसभामुख सुवाशचन्द्र नेम्वाङ्गले सिंहदरबारको अधिकार गाउँमा ल्याउनका लागि आजको दिन महत्वपूर्ण रहेको बताउनुभयो । जनताले जनताको लागि बनाइएको संविधान कार्यान्वयन गर्नु सबैको दायित्व हुने भन्दै उहाँले दायित्व पूरा गर्न सबैलाई आह्वान गर्नुभयो । नेम्वाङ्गले इलाम नगरपालिका वडा नम्बर ७ को महेन्द्र रत्न बहुमुखी क्याम्पसको मतदान केन्द्रबाट मतदान गर्नुभयो ।

खनाल र नेम्वाङ्गले बिहान ८ बजे मतदान गर्नुभएको थियो ।