काठमाडौँ, २५ बैशाख । चुनावमा विपक्षीलाई अन्तिम धक्का दिने र आफ्नो पार्टीका उम्मेदवारलाई विजयी गराउने अन्तिम प्रयास स्वरुप नेपाली कांग्रेस, नेकपा एमाले, माओवादी केन्द्र लगायत दलका शीर्ष नेताहरु चुनावी सभामा व्यस्त छन् । अघिल्लो स्थानीय तह निर्वाचनमा पार्टीले भोगेको हार र त्यसले पार्टीभित्रैबाट आफुविरुद्धको विरोधले शिक्षा लिनुभएका कांग्रेस सभापति शेरवहादुर देउवा यसपटक निर्वाचन केन्द्रीत चुनावी प्रचारमा आक्रामक ढंगले लागिरहनुभएको छ ।

सभापति शेरवहादुर देउवाले गत बुधबार मोरङको विराटनगरमा आयोजित चुनावी सभालाई सम्बोधन गर्नुभयो । नेपाली कांग्रेसका संस्थापक नेता बिपी कोइरालाको गृहनगर विराटनगर, जसलाई कांग्रेसजनले राजनीतिक तीर्थ मान्ने गर्छन । त्यहाँको चुनावी सभाबाट सभापति देउवाले आन्तरिक विवाद अन्त्य गरी पार्टी एकतावद्ध भएको सन्देश दिने प्रयास गर्नुभयो । त्यसलगत्तै चितवनको भरतपुर र काठमाडौंको चुनावी सभालाई सम्बोधन गर्नुभयो । सत्तारुढ पाँच दलीय गठबन्धनको नेतृत्व, कांग्रेसमाथि गठबन्धन आश्वस्त नभएको अवस्थामा देउवाको जोड विश्वास आर्जनमा केन्द्रीत रहने गरेको छ ।

शनिबार चुनावी दौडधुपलाई थप तिव्रता दिनुभएका देउवाले एकैदिन तीन जिल्लाको चुनावी कार्यक्रममा सहभागिता जनाउनुभयो । बिहान रुपन्देहीको बुटवल, दिउँसो तनहुको दमौली र सोही दिन अपरान्ह धनुषाको जनकपुरमा चुनावीसभामा बोल्नुभयो । त्यहाँ देउवाले गठबन्धनको विरोध गर्नेलाई पार्टीले कारवाही गर्ने चेतावनी दिनुभयो । आइतबार बिहान पोखरामा आयोजित गठबन्धनको संयुक्त चुनावीसभालाई सम्बोधन गर्नुभएका देउवा त्यही दिन दाङको तुलसीपुर र घोराही पुग्नुभयो । २७ गते मध्यरातीबाट सुरु हुने स्थानीय तह निर्वाचनको मौनअवधि अघिसम्म देउवाले सोमबार कैलालीको धनगढी र त्यसैदिन गृहजिल्ला डडेलधुरा पुगेर चुनाव प्रचार अभियान बिट मार्नुहुने छ ।

एकतातिर देउवालाई अघिल्लो निर्वाचनको बेहोरेको हारको बदला लिन नैतिक दवाब छ भने अर्कोतिर पाँच दलीय गठबन्धनबीच गरेको चुनावी तालमेल बाचा सही सावित गर्नुपर्ने चुनौती छ । गठबन्धनले अपेक्षित परिणाम हात पारेन भने त्यसको बाछिटाले देउवाको राजनीतिक निष्ठामा प्रश्न उठ्छ नै, पार्टीको साखमा धक्का लाग्ने निश्चित छ ।