काठमाडौँ, २२ बैशाख । स्थानीय तह निर्वाचन नजिकिएसँगै जिल्लामा चुनावी रौनकले रंगिएको छ । राजनीतिक दलहरूका फरक-फरक झण्डा र चुनावी गीतले यहाँको माहोल रंगीन लाग्छ । निर्वाचनका लागि केही दिन मात्र बाँकी छँदा उम्मेदवारहरूले चुनावी कार्यक्रमलाई तीव्र पारेका छन् ।

जिल्लाको ६ वटै पालिका र ४३ वटै वडाहरूमा दलहरूले आकर्षक चुनावी नारा लिएर घरदैलो कार्यक्रमलाई तीव्रता दिँदा मतदाता पनि उम्मेदवार र उनका एजेण्डा परख्दै छन् । तेह्रथुममा गठबन्धन र एमालेबीच कडा प्रतिप्रर्धा हुने देखिएको छ । यद्यपि गठबन्धनका कारण एमालेको संकट भने बढेको छ ।२०७४ को स्थानीय निर्वाचनमा एमालेले बढी सिटमा आफ्ना उपस्थिति देखाए पनि यसपटक भने एमालेले सोचेजस्तो जित ल्याउन कठिन हुने देखिएको छ । एमालेका पालिका अध्यक्षमध्ये आठराई गाउँपालिका अध्यक्ष मानबहादुर लिम्बु एकीकृत समाजवादीमा हुनुहुन्छ । म्याङलुङ नगरपालिका उप-प्रमुख पार्वती सानु डाँगी एमालेबाट टिकट नपाएपछि एकीकृत समाजवादीमा प्रवेश गर्नुभएको छ ।

गठबन्धनले जित्ने आँकलन भइरहे पनि नेकपा (एमाले) भने त्यो मान्न तयार छैन । गत निर्वाचनमा आफ्ना प्रतिनिधिहरूले राम्रा काम गरेका जिल्लामा पुनः एमालेकै झण्डा लहरिने एमाले तेह्रथुमका अध्यक्ष तेजमान कन्दङवा बताउनुहुन्छ । जिल्लाको छथर गाउँपालिकाको अध्यक्षमा नेकपा (माओवादी केन्द्र) ले गठबन्धनको तर्फबाट साझा उम्मेदवार उठाउँदा नेपाली कांग्रेसबाट उपाध्यक्षमा उम्मेदवारी दिएका छन् ।आठराई र फेदाप गाउँपालिकाको अध्यक्षमा कांग्रेसले उम्मेदवारी दिँदा माओवादीले उपाध्यक्षमा चित्त बुझाएको छ । म्याङलुङ नगरपालिका प्रमुखमा पनि कांग्रेसले उम्मेदवार उठाउँदा र उपप्रमुखमा भने नेकपा (एकीकृत समाजवादी) चुनावी मैदानमा छन् । उता, लालीगुराँस नगरपालिकाको प्रमुख, उपप्रमुख र मेन्छ्यायेम गाउँपालिकाको अध्यक्ष र उपाध्यक्षमा नेपाली कांग्रेस एकल चुवानी मैदानमा छ ।

पार्टीको सम्पूर्ण संगठन परिचालन भएकाले जित गठबन्धन र कांग्रेसकै हुने जिल्ला सभापति अर्जुन तुम्बाहाम्फेको दाबी छ । दलहरू जित आफ्नो पक्षमा पार्न आ-आफ्ना घोषणा पत्र सार्वजानिक गर्दै जनताको हात हातमा थमाइरहेका छन् । पालिका तथा वडाहरूमा पाँच दलमा नरहेका अन्य दलहरूसँग पनि तालमेल गर्दै लोकतान्त्रिक-वाम गठबन्धन चुवानी मैदानमा छ । जनताको समृद्धी र सुखका लागि गठबन्धन बनाएर चुनावी मैदानमा उत्रिएको नेकपा (माओवादी केन्द्र), तेह्रथुमका संयोजक ईन्द्र इक्सङ बताउनुहुन्छ । ५७ मतदान स्थल र ९५ मतदान केन्द्र रहने जिल्लामा ३६ हजार ९७३ पुरुष र ३५ हजार ९२२ महिला गरी कुल ७२ हजार ८९५ मतदाता छन् ।