काठमाडौँ, १२ बैशाख । माओवादी केन्द्रका नेता एवं प्रवक्ता कृष्णबहादुर महराले गठबन्धनमा आफ्नो हैसियत अनुसार पार्टीहरूबीच भागवण्डा भएको बताउनुभएको छ । सोमबार पार्टी कार्यालयमा भएको पत्रकार सम्मेलनमा बोल्दै महराले गठबन्धनमा कसैले कसैले पेलेको अनुभूति नगर्न आग्रह गर्नुभयो ।

उहाँले भन्नुभयो-‘कहिँ कहिँ काँग्रेसले माओवादीलाई पेलेको भन्ने, कहिँ माओवादीले काँग्रेसलाई पेलेको भन्ने कुरा आउने गरेको छ । आज बिहान काँग्रेसका केन्द्रीय सदस्य भन्नुहुन्थ्यो अति भयो, पेल्नुभयो धेरै, छोड्दिँउ भन्नुभयो । कतै काँग्रेसले पेलेको अनुभूति हुन्छ कतै माओवादीले काँग्रेस पेलेको अनुभूति हुन्छ । गठबन्धनमा यस्तो हुन्छ । गठबन्धन भनेकै फरक विचारधारा राख्ने पार्टीहरू बीचको संयुक्त मोर्चा हो । सबैकुरा भनेको जस्तो कहिँपनि हुँदैन ।’ उहाँले कुनैपनि पार्टीले पेलेको भन्ने महशुस गर्न नहुने बताउनुभयो। उहाँले गठबन्धनको मान्यतालाई मानेर आफ्नो हैसियत क्षमता जति छ त्यहीअनुसार भागवण्डा भएको बताउनुभयो । उहाँले भन्नुभयो-‘कतै कतै के भएको छ भने काँग्रेस बाहेक सबै मिलेको छ । कतै काँग्रेस सहित सबैसँग मिलेको छ । तर यो कुरा बिस्तारै अघि बढ्छ । बिस्तारै कुरा मिल्छ ।’

चितवनको महानगर भरतपुर र दाङको घोराही उपमहानगरमा गठबन्धनले संयुक्त रुपमा माओवादी केन्द्रको तर्फबाट उम्मेदवारी दर्ता गराएको उहाँले बताउनुभयो । महराले ६० प्रतिशत गठबन्धन बनाउन सफल भएको र केही मिलाउन बाँकी रहेको बताउनुभयो । गठबन्धन मिलाएर जान कतै छलफल भइरहेको र बेलुकासम्म सबै मिल्ने सम्भावना रहेको उहाँको भनाई छ ।

उहाँले भन्नुभयो-‘प्रतिगमनको विपक्षमा, अग्रगमनको पक्षमा गठबन्धन भएको र यो सफल भएको छ । संविधान रक्षाका लागि यो अगाडि बढ्छ र बढ्दै जान्छ ।’ पार्टीको तर्फबाट घोषणा पत्रको सट्टा अपिल प्रकाशन गरेको र आ-आफ्नो स्थानीय तहले घोषणापत्र प्रकाशन गर्ने उहाँले बताउनुभयो । शक्तिको विकेन्द्रीकरण गर्ने पार्टीको सिद्धान्त रहेकोले केन्द्रको अधिकार तल्लो तहमा दिने उद्देश्यअनुसार स्थानीय तहलाई अधिकार दिएको उहाँले बताउनुभयो ।