काठमाडौं, १२ असार । गएको मध्य रात अर्थात रातको १२ बजेदेखि मौन अवधि शुरु भएको छ । मौन अवधि शुरु हुने वित्तिकै चुनाव प्रचार प्रसार रोकिएको छ । मौन अवधिभर उम्मेदवारले मतदातालाई प्रभावित पार्ने र प्रचारका कुनै पनि काम गर्न पाउने छैनन् । मौन अवधिभर तोकिएको आचारसंहिता उल्लङघन गरेमा कारवाही हुनेछ ।

निर्वाचन आचारसंहिता अनुसार मतदानको समय सुरु हुनु ४८ घण्टाअघि अर्थात आइतबार मध्यरातबाट मौन अवधि शुरु भएको छ । मौन अवधि शुरु भएसँगै उमेदवारले मतदातालाई प्रभावित गर्न र प्रचारप्रसार गर्न नपाउने भएका छन् । प्रमुख दलका शीर्ष नेतासहित उम्मेदवारहरु चुनावी सभा, ¥याली र मतदातास“गको भेटघाटमा आईतवार दिउसोसम्म व्यस्त रहेका थिए । तर मौन अवधि शुरु हुने वित्तिकै शिर्ष नेताहरु जिल्लाबाट फर्केका छन् भने उम्मेदवार पनि प्रचारको काम रोकेर निर्वाचनको प्रतिक्षामा बसेका छन् । मनोनयन दर्ता पछि एक साता निरन्तर प्रचार प्रसार शुरु गरेका उम्मेदवारहरुले मौन अवधि शुरु हुने वित्तिकै कुनै पनि माध्यमवाट प्रचार प्रसार गर्न नपाउने निर्वाचन आयोगका प्रवक्ता सूर्य प्रसाद शर्माले बताए ।

मौन अवधि सन्चार माध्यमहरुलाई पनि लागू हुन्छ । यस अवधिमा कुनै पनि राजनीतिक दल वा उम्मेदवारलाई भोट माग्दै विज्ञापन वा सन्देश प्रकाश प्रसारण गर्न रोक लगाइएको छ । त्यस्तै सामाजिक सञ्जाल फेसबुक, ट्विटर लगायतमा समेत मौन अवधिमा प्रचार प्रसार गर्न निर्वाचन आयोगले रोक लगाएको छ ।

आयोगले जारी गरेको निर्वाचन आचारसंहिता अनुसार मौन अवधिमा ‘एसएमएस, फेसबुक, भाइबर जस्ता विद्युतीय माध्यमद्वारा प्रयोग गरिने सामाजिक सञ्जालमार्फत मत माग्न र निर्वाचनमा प्रचार प्रसार गर्न नहुने उल्लेख गरेको छ । त्यस्तै दलका उम्मेद्ववारहरुले राजनीति दलको चिन्ह अंकित टिसर्ट, टोपी र स्टीकर प्रयोग गर्न समेत पाउने छैनन् । मौन अवधिमा आचारसंहिता उल्लङघन गरेमा निर्वाचन आयोगले सुरुमा सचेत गराउने र आयोगले सचेत गराउदा पनि बेवास्ता गरेमा उम्मेदवार र दललाई आयोगले एक लाख रुपैया“सम्म जरिवाना गर्न सक्ने प्रवक्ता सुर्य प्रसाद शर्माले बताए ।

आचारसंहिताको परिच्छेद २ को नियम ५ (घ) अनुसार मौन अवधिमा उम्मेदवारले मौन अवधि सुरु भएपछि निर्वाचन प्रचारप्रसार गर्न र मत माग्न नपाउने र मौन समय सुरु हुनुअघि मतदान केन्द्रको ३ सय मिटर वरिपरि राखिएका निर्वाचन चिह्न तथा प्रचार सामग्री हटाएको हुनुपर्ने उल्लेख गरिएको छ । । निर्वाचनका लागि खटिएका कर्मचारीहरुले मौन अवधिभित्रै मतदान केन्द्रहरु तयार गर्नेछन् । आयोगको आचारसंहिता राजनीतिक दल, उम्मेदवार, दलका कार्यकर्ता, निर्वाचनमा खटिने कर्मचारी सवैले पालना गर्नुपर्ने हुन्छ ।