काठमाडौँ, १४ चैत । नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले एमाले अध्यक्ष केपी शर्मा ओलीले राजावादी शक्तिहरूसँग भेटेर खतरनाक योजना बनाउने गरेको बताउनुभएको छ । सोमबार काठमाडौंमा युवा संघ नेपालको केन्द्रीय सचिवालय बैठकलाई सम्बोधन गर्दै अध्यक्ष नेपालले नेकपा (एमाले) का अध्यक्ष ओली राजावादी शक्तिहरूसँग मध्यरातमा अज्ञात ठाउँमा बसेर खतरनाक योजनाहरू बनाउने गरेको आरोप लगाउनुभएको हो ।

उहाँले भन्नुभयो, ‘उनी (ओली) राजावादी शक्तिहरू सँग मध्यरातमा गएर गोप्य रूपमा भेट गर्ने गर्दछन् भन्ने सूचनाहरू चुहिने गरेको छ, कालो सिसाको गाडीमा चढेर, अर्कोले ड्राइभ गरेर कहीँ पुर्‍याउने गर्दछ र भेटघाट गरेर खतरनाक योजनाहरु बनाउने गरेको भन्ने सुन्नमा आउँछ ।’ उहाँले थप्नुभयो, ‘हुनत पहिले पनि विदेशी जासुसी संस्थाका प्रमुखसँग मध्यरातमा बालुवाटारमै प्रधानमन्त्रीको निवासमा एक्लै भेटघाट गरेको, गोप्य भेटघाट गरेको र कुटनीतिक हिसाबले नसुहाउँदो भेटघाट गरेको कुरा त सार्वजनिक भइसकेकै छ ।’ अध्यक्ष नेपालले ओली विगतदेखि नै गणतन्त्रको पक्षमा नभएको भन्दै तत्कालिन एमालेमा आफ्नो पक्षमा रहेका ‘दश भाइ’ नेताहरूकै सहारा र सहयोगमा ओलीविरुद्धमा लागेको भए पनि आफूले उनीहरूबाट धोका पाएको बताउनुभयो ।

अध्यक्ष नेपालले तत्कालिन समयमा आफू ओलीका विरुद्धमा चट्टानी अडानका साथ उभिएको पनि बताउनुभयो । ‘दश भाइको सहारामै म अगाडी बढेको थिएँ र सहयोग पनि गरेका हुन्, चुनौती दिने बेलामा पनि साथ दिएकै पनि हुन्,’ उहाँले भन्नुभयो, ‘तर ऐन, मौकामा धोका दिने स्थिति बन्यो, एक्लो म रहनुपर्ने स्थिति बन्यो, सतिसाल झैँ देढताका साथ उभिएको, चट्टानी अडानका साथ उभिएकै हो ।’ अध्यक्ष नेपालले ओलीसँग विद्रोह गर्न नसकेकाहरु एमालेमा निरीह भएर बसेको टिप्पणी गर्नुभयो । उनीहरूलाई कमिटीमा एक शब्द पनि बोल्न नदिइएको, छलफल र परामर्शमा भाग लिन नदिएको भन्दै उहाँले आफूहरू त्यसैगरी बेइज्जत नहुनका लागि एमाले छाडेको बताउनुभयो ।

एमालेले गुण्डा जमात तयार पारेकाले त्यहाँ फरक मत राख्नेलाई हातपात पनि हुनसक्ने उहाँले बताउनुभयो । अध्यक्ष नेपालले समानुपातिक निर्वाचन प्रणाली र प्रत्यक्ष निर्वाचित राष्ट्रपति वा प्रधानमन्त्रीको व्यवस्थामा पार्टी उभिएमा वामदेव गौतमपनि समाजवादीमा आउन चाहेको बताउनुभयो । तर, केपी ओलीले प्रत्यक्ष निर्वाचित कार्यकारी भएर पाँच वर्ष चलाउन पाए आफूहरुको हड्डी जाँतोमा पिसेर सिध्याइदिने भन्दै त्यसो गर्न नसकिने जवाफ दिएको उहाँले बताउनुभयो । उहाँले पार्टीका युवाहरुलाई आगामी स्थानीय तहको निर्वाचनमा केन्द्रीत हुन निर्देशन दिनुभयो ।