काठमाडौँ, २७ फागुन । श्रीलंकाका स्टार खेलाडी सम्मीलित श्रीलंका संयुक्त-११ विरुद्ध नेपाल पराजित भएको छ । श्रीलंका भ्रमणमा रहेको नेपाल आफ्नो अन्तिम अभ्यास खेलमा श्रीलंका संयुक्त-११ संग ९२ रनले पराजित भएको हो । २ सय ३३ रनको लक्ष्य पन्छ्याएको नेपाल ३५ ओभर २ बलमा १ सय ४० रन बनाउंदा अल आउट भयो । नेपालका ज्ञानेन्द्र मल्लले सर्वाधिक ४६ रन बनाए ।

धरासायी बनेको नेपालको इनिङलाई मल्लले उकास्ने प्रयास गरेका थिए । मल्ल आउट भएसंगै नेपाल पुन: कमजोर बनेको थियो । कुशल भुर्तेलले ३२ रन बनाउंदा रोहित कुमार पौडेलले २१ रनको योगदान गरे । यस्तै आरिफ शेखले १३, सोमपाल कामीले ८, आसिफ शेखले ५, दिपेन्द्र सिंह ऐरीले २ रन, बिनोद भण्डारी र सगर ढकालले समान १र१ रन बनाउंदा बिक्रम सोब डक आउट भए । सन्दीप लामिछाने भने खाता नखोली अविजित रहे । श्रीलंका संयुक्त-११ का एस दक्सिनाले ३ तथा दिलसान मुनविराले २ विकेट हात पारे ।

यसअघि नेपालले खेलेको तीन अभ्यास खेलमा सहज जित हात पारेको थियो । नेपालले यसअघि श्रीलंका पुलिस र श्रीलंका नेभीसंग अभ्यास खेल खेलेको थियो । नेपालले आईसीसी विश्वकप लिग दुई अन्तर्गतको सिरिजको लागि तयारी स्वरुप श्रीलंका भ्रमण गरेको हो । नेपालले आगामी इसिरिज यूएईमा खेल्दै छ । अब नेपाली टोली श्रीलंकाबाटै मार्च १४ मा युएई प्रस्थान गर्ने छन् । नेपालले लिग दुई अन्तर्गतको आफ्नो तेस्रो सिरिजमा युएई र पपुवा न्यू गिनी (पीएनजी) विरुद्ध खेल्नेछ ।