काठमाडौँ, २४ फागुन । नेकपा एमालेका अध्यक्ष केपी शर्मा ओलीले सभामुख अग्नि सापकोटाको आलोचना गर्दै सभामुखले मनपरी गरेको आरोप लगाउनुभएको छ । मंगलबार काठमाडौंमा अन्तराष्ट्रिय नारी दिवसका अवसरमा अखिल नेपाल महिलासंघले गरेको कार्यक्रममा बोल्दै उहाँले सभामुख स्वेच्छाचारी भएको टिप्पणी गर्नुभयो ।

सभामुख सापकोटाले तमासा देखाएको आरोप लगाउँदै उहाँले भन्नुभयो-‘सभामुखको तर्फबाट नियम कानुन भन्ने कुराको कुनै मतलव छैन् । स्वेच्छाचारिता, मनपरितन्त्र, कुनै पार्टीको अध्यक्षले ब्यक्तिगत तबरमा गरेको निर्णयका आधारमा सूचना जारी गरिदिने, कुनै पार्टीले केन्द्रीय कमिटीले निर्णय गरेको पार्टीको सरकार ढाल्ने, पार्टी फुटाएर हिँड्ने, प्रतिक्रियावादीहरुलाई फाइदा पुर्‍याउने, दुई तिहाईको आसपासमा पुगेको वामपन्थी आन्दोलनलाई चकनाचुर पारेर दक्षिणपन्थीहरुको पाउ मोल्न जानेहरूलाई निकालेको पनि सदर नगरी सभामुख बसिरहेका छन् ।’ उहाँले अदालत, सभामुख, सरकार, निर्वाचन आयोग सवै एमालेको बिरुद्धमा लागेको आरोप लगाउनुभयो । उहाँले परमादेशबाट मुद्धा जितेर बनेको सरकार एमालेको विरोधी स्वभाविक भएको बताउँदै मुद्धा जितेर पनि कहीँ सरकार बन्छ भन्दै प्रश्न गर्नुभयो ।

उहाँले भन्नुभयो-‘अव मुद्धा जितेर कोही स्थानीय तहको मेयर बन्छ ? मुद्धा जितेर मन्त्री, प्रधानमन्त्री बन्ने कस्तो जमाना आयो । लोकतन्त्र भनेको छ मुद्धा जितेर आएको छ ।’ उहाँले समृद्ध नेपाल सुखी नेपाली भनेर आफूले पढाएपनि आफ्ना विरोधीहरुले त्यो सिक्नै नसकेको दावी गर्नुभयो ।