काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेले विचार र राजनीतिक छलफल बिनाको तथाकथित महाधिवेशन आयोजना गरेको आरोप लगाउनुभएको छ ।

माओवादी केन्द्रको राष्ट्रिय सम्मेलनका क्रममा शनिबार देशैभरका ७ सय ५३ वटै स्थानीय तहको अधिवेशन भर्चुअल समुद्घाटन कार्यक्रममा उहाँले चितवनमा एमालेले विचार र राजनीतिक छलफल बिनाको तथाकथित महाधिवेशन गरेको बताउनुभएको हो । ‘चितवनमा भएको महाकुम्भमा वैचारिक, राजनीतिक विषयमा कुनै छलफल भएको छैन । त्यहाँ तथाकथित महाधिवेशन भएको छ ।’, अध्यक्ष प्रचण्डले भन्नुभयो । उहाँले यसकारण पनि एमाले महाधिवेशनसँग माओवादी केन्द्रको तुलना नै हुन नसक्ने समेत प्रष्ट्याउनुभयो ।

देशमा लामो समयको संघर्ष र बलिदान पश्चात् वर्तमान परिस्थती सिर्जना भएको बताउनुहुदै उहाँले माक्र्सवाद, लेनिनवाद र माओवादको मार्गनिर्देशक सिद्धान्तमा आधारित भई सम्मेलनमा नयाँ विचारको संश्लेषण गर्नुपर्ने बताउनुभयो । देशमा अहिले वर्तमन परिस्थिती, राष्ट्रिय तथा अन्तराष्ट्रिय रुपमा सैद्धन्तिक, राजनीतिक एवम् वैचारिक गर्ने पार्टी माओवादी केन्द्रबाहेक अरु पार्टी नरहेको समेत उहाँले दाबी गर्नुभयो । विगतमा एमाले अध्यक्ष केपी शर्मा ओली गुटकै कारण नेकपा विघटन भएको बताउनुहुदै उहाँले विघटित प्रतिनिधिसभा पुर्नस्थापना गरेसँगै माओवादी आन्दोलन सफल भएको र प्राप्त उपलब्धिसँगै पार्टीको संगठन सुधारमा पनि जोड दिनुभयो । उहाँले देशैभरमा पार्टीको वडा सम्मेलन उत्साहजनकरुपमा सम्पन्न भएको पनि बताउनुभएको छ । यसैगरी, पार्टीलाई क्रान्तीकारी समाजवादीको रुपमा स्थापित गर्न केन्द्रदेखि सतह स्तरसम्म एकै धारणा निर्माण हुन आवश्यक रहेको उहाँको भनाई छ ।