काठमाडौं , ७ असार । विभिन्न ६ समूहले नयाँ बिमा कम्पनीको लाइसेन्स लिनका लागि छुट्टाछुट्टै दौडधुप सुरु गरेका छन् । केही साता अघि नियामक निकाय बिमा समितिले हिमालयन रिइन्स्यारेन्सलाई सञ्चालन अनुमति दिने निर्णय गरेको थियो ।त्यसपछि बिमा कम्पनीका लागि समेत लाइसेन्स पाउन सकिने भन्दै दौडधुप बढाएका हुन् ।

अहिले निर्जिवन बिमा कम्पनीको सञ्चालन अनुमतिका लागि बिमा समितिका पूर्व कार्यकारी निर्देशक श्रीमान कार्की, बिमा कम्पनीका पुराना सीईओ रमेश भट्टराईका साथै केही व्यापारिक घरानाका व्यक्तिहरुले समेत नयाँ बिमा कम्पनीका लागि तयारी गर्नुभएको छ। कार्की र भट्टराई दुबै जनाले पुनर्बिमा कम्पनीका लागि आवेदन दिएर पनि लाइसेन्स पाउनु भएको थिएन । अहिले कार्कीले अभियान जनरल इन्स्यारेन्स कम्पनी र भट्टराईले महालक्ष्मी जनरल इन्स्यारेन्सको नाममा कागजात तयार पारिरहेको एक स्रोतले जनाएको छ । यसैगरी केही व्यापारिक समूहले मनकामना जनरल इन्स्योरेन्स, स्ट्याण्र्डड लाइफ इन्स्योरेन्स, युनी लाइफ इन्स्योरेन्स र काठमाडौं जनरल इस्योरेन्सका नाममा लाइसेन्सका लागि तयारी गरिएको बुझिएको छ ।

प्रस्तावित युनी लाइफमा भने वन तथा वातावरण मन्त्री नारणमूनी रानाले समेत संस्थापक सेयरका लागि फारम भर्नुभएको छ । तत्कालीन अध्यक्ष चिरञ्जीवि चापागाईंको पालामा १९ वटा बिमा कम्पनीहरुले लाइसेन्स पाएका थिए । त्यसपछि भने अब संख्या धेरै भएको भन्दै लाइसेन्स बन्द गरिएको थियो । बिमा समितिका कार्यकारी निर्देशक राजुरमण पौडेल अहिले पनि बन्द नै रहेको बताउँनुहुन्छ । अहिले नयाँ लाइसेन्सका लागि आवेदन समेत नलिने उहाँले बताउनुभयो ।तर, समितिले सुटुक्क केही कम्पनीहरुलाई लाइसेन्स दिन सक्ने सम्भावना देखिएकाले ६ वटा समूहले तयारी थालेका छन् । ‘हामीले अहिले कागजात बनाइरहेका छौं, भोलि जुनसुकै बेला समितिले आवेदन माग गर्न सक्छ’ एक व्यवसायीले भन्नुभयो , ‘प्रधानमन्त्रीले नै आवेदन खुला गर्नु भनेपछि समितिको अध्यक्षको केहि लाग्दैन ।’