पोखरा, १९ बैशाख । गण्डकी प्रदेशका सभामुख नेत्रनाथ अधिकारीले कार्यव्यवस्था परामर्श समितिको बैठक बोलाउनु भएको छ । १५ वैशाखबाट स्थगित बैठक सुरु गर्न सभामुख अधिकारीले कार्यव्यवस्था परामर्श समितिको बैठक बोलाउनु भएको हो । एमाले संसदीयदलका प्रमुख सचेतक मायानाथ अधिकारीका अनुसार सोमबार ११ बजेका लागि बैठक डाकिएको छ । एमाले भने उक्त बैठकमा उपस्थित हुन/नहुने पक्का छैन । मुख्यमन्त्रीसमेत रहेका एमाले संसदीय दलका नेता पृथ्वीसुब्बा गुरुङसँग छलफल गरेर बैठकमा जाने/नजाने निधो गर्ने अधिकारीले बताउनुभो । ‘हामी जाने/नजाने टुंगो छैन । बैठकभन्दा अघि दलको नेतासँग छलफल गरेर टुंगो लगाउँछौं,’ अधिकारीले भन्नुभयो । सभामुख नेत्रनाथ अधिकारीले आइतबारबाट दलहरुसँग छलफल थाल्नु भएको छ । । आइतबार सभामुख अधिकारीले राष्ट्रिय जनमोर्चाका संसदीयदलका नेता कृष्ण थापासँग समेत गर्नुभएको छ । बिहान ११ बजे सांसद थापा र सभामुखबीच भेटवार्ता भएको थियो । भेटमा सभामुख अधिकारीले जनमोर्चाका १५ वैशाखको बैठकमा अनुपस्थित सांसद खिमविक्रम शाहीबारे जानकारी लिनुभएको थियो । जनमोर्चाकी सचेतक पियारी थापाले सांसद शाहीको अवस्था अज्ञात रहेको भन्दै निवेदन दिएपछि सभामुखले अविश्वास प्रस्तावमाथिको मतदान प्रक्रिया सुरु नगरी अनिश्चितका लागि बैठक स्थगित गर्नुभएको थियो । सभामुख अधिकारीलाई राजमो संसदीय दलका नेताथापाले शाही भेटिएको औपचारिक जानकारी गराएका छन् । ‘मैले जानकारी गराएँ, संसद कसरी सुरु गर्ने भन्नेबारे उहाँले दलको रायलिनुभयो,’ सांसद थापाले भन्नुभयो । भेटमा सांसद थापाले संसदको बैठक यथाशीघ्र छिटो डाक्न अनुरोध गरेको समेत बताउनुभयो । आफ्नो दलका कारण सदन अनिश्चितकालका लागि स्थगित भएपछि छिटो सुरु गर्न सुझाव दिएको थापाले बताउनुभयो । ‘दलको कारण धेरै समय स्थगित भएको छ, अब छिटो सुरु गर्नुस् भनेको छु,’ थापाले भन्नभयो । सभामुखले छलफलबिनै सदन स्थगित गरेको थापाको बुझाइ छ । अर्कोतर्फ राजमोकी सांसद पियारी थापा सांसद हराएपछि खोजीमा लाग्न बैठक स्थगित भएको बताउनुभयो । ‘कम्तीमा कार्यव्यवस्थाको बैठक राखेर बैठक स्थगित गर्नुपथ्र्यो नि, कि त प्रमुख सचेतकहरुलाई राखेर बुझ्नुपर्थ्यो,’ राजमो संसदीयदलका नेता थापाले भन्नुभयो सदन स्थगित गर्नेबारे निवेदन दिने बेला सांसद पियारी थापाले दलको कुरा नसुनी निवेदन दिएको उहाँको भनाइ छ । सभामुख नेत्रनाथअधिकारीले कृष्ण थापासँग छलफल गर्नुअघि कांग्रेस संसदी यदलका नेता कृष्णचन्द्र नेपाली पोखरलेसँग फोनवार्ता गर्नुभको थियो । ‘सभामुखज्यूले हाम्रा दलका नेतासँग पनि फोनवार्ता गरिसक्नु भएको छ,’ कांग्रेस सांसद कुमार खड्काले भन्नुभयो । ६० सदस्यीय गण्डकी प्रदेश सभामा एमालेका २७ सांसद छन् । एमालेलाई १ स्वतन्त्र सांसदको साथ छ । कांग्रेसका १५, माओवादीका १२, जनमोर्चाका ३ र जसपाका २ सांसद छन् । अविश्वास प्रस्तावमा ३२ सांसदको साथ छ । गण्डकी प्रदेश सभामा कांग्रेस नेतृत्वको विपक्षी मोर्चाले २ वैशाखमा अविश्वास प्रस्ताव पेस गरेका थिए । १५ वैशाखको बैठकको कार्यसूचीमा चढेको अविश्वास प्रस्तावमा मतदान नभई बैठक स्थगित भएपछि सत्ता र विपक्षी पार्टीबीच अविश्वासमा मतदान हुने/नहुनेमा तर्क–वितर्क हुन थालेको छ ।
प्रतिक्रिया दिनुहोस्