काठमाडौं, २३ फागुन । प्रधानमन्त्री केपी शर्मा ओली आफैंले संसदमा विश्वासको मत नलिने हुनुभएको छ । विधि र पद्धतिअनुसार अविश्वासको प्रस्ताव आए सामना गर्ने उहाँले बताउनुभयो ।

प्रधानमन्त्री ओलीको सिफारिसमा भएको संसद विघटनलाई सर्वोच्च अदालतले बदर गरेपछि पुनस्र्थापित प्रतिनिधिसभाको बैठक आज २३ गते बोलाइएको छ । त्यसको अघिल्लो दिन हिजो (शनिवार) ओली समूहले प्रधानमन्त्री निवास बालुवाटारमा संसदीय दलको बैठक बोलाएको थियो, जसमा प्रतिनिधिसभा र राष्ट्रियसभाका गरी ११५ सांसद सहभागी भएको राष्ट्रियसभाका प्रमुख सचेतक खिमलाल भट्टराईको दाबी छ ।

प्रचण्ड–माधव समूहले पनि संसदीय दलका बहुमत भएको दाबी गरेको छ भने बामदेव गौतमसहित केही सांसद दुवैतिर लाग्नु भएको छैन । आफ्नो समूहका सांसदहरुको बैठकमा दलका नेता एवं प्रधानमन्त्री ओलीले अविश्वासको प्रस्ताव आए सामना गर्ने बताउनुभयो। आफूसँग बहुमत रहेको भन्दै उहाँले भन्नुभयो , ‘संसदमा अविश्वासको प्रस्ताव आयो भने डटेर सामना गर्छौं र जित हाम्रै हुन्छ ।’राष्ट्रियसभा सदस्य सुमन प्याकरेलका अनुसार प्रधानमन्त्री आफैंले संसदमा विश्वासको मत लिने सम्भावना छैन ।

‘संसद विघटन गर्दा उहाँले जुन प्रश्न उठाउनु भएको थियो, त्यो ठीक थियो भन्ने पुष्टि भएको छ,’ उहाँले भन्नुभयो , ‘त्यसैले प्रधानमन्त्री आफैंले विश्वासको मत लिने भन्ने प्रश्नै आउँदैन ।’ नेकपा कानूनी रुपमा एक रहँदासम्म प्रचण्ड–माधव समूहले प्रधानमन्त्री ओलीविरुद्ध संसदमा अविश्वासको प्रस्ताव ल्याउनै नसक्ने ओली समूहको दाबी छ । नेकपा संसदीय दलको विधानअनुसार दलको नेताविरुद्ध अविश्वासको प्रस्ताव आएमा भने त्यसको सामना गर्ने सांसद तथा अर्थमन्त्री विष्णु पौडेले बताउनुभयो ।