काठमाडौं  २१ फागुन । नेपाल कम्युनिष्ट पार्टी (नेकपा) ले पार्टीले संसदीय दलको नेतामा पुष्पकमल दाहाल प्रचण्डलाई दलको नेता चयन गरेको छ । प्रचण्ड नेपाल पक्षको नेकपानिकट सांसदहरुको बैठकले प्रचण्डलाई संसदीय दलको नेतामा चयन गरेको हो । गत पुष ५ गते प्रधानमन्त्री केपी शर्मा ओलीले प्रतिनिधिसभा विघटन गरेपछि प्रचण्ड नेपाल पक्षले ओलीलाई कारवाही गरेर प्रचण्डलाई दलको नेता भएको घोषणा गरेको थियो । तर, कानुनी रुपमा वैधता दिनेगरी सो पार्टीले आज औपचारिक रुपमा दलको नेता चयन गरेको हो ।संसदीय दलका मुख्य सचेतक देव गुरुङले भन्नुभयो ‘यसअघि हामीले संसदीय दलको नेताबाट केपी शर्मा ओलीलाई हटाउने निर्णय गरेका थियौं । तर त्यतिबेला प्रतिनिधिसभा नभएको हुँदा केही कानुनी विषय बाँकी रह्यो । अहिले विधिवत रुपमा अध्यक्ष कमरेड प्रचण्डलाई चयन गरेका हौं ।’ जेष्ठ सदस्य झलनाथ खनालको अध्यक्षतामा बसेको बैठकले प्रचण्डलाई दलको नेतामा सर्वसम्मत चयन गरेको हो । दलको नेताको प्रस्ताव माधव कुमार नेपालले गर्नुभएको थियो भने पम्फा भुषालले समर्थन गर्नुभएको थियो ।