ताप्लेजुङ, १८ फागुन । ताप्लेजुङको मेरिङदेन गाउँपालिका वडा नम्बर ३, दोभान बजारमा लागेको आगो थप फैलिनबाट रोकिएको छ । मंगलबार बिहान करिब साढे ९ बजेदेखि शुरू भएको आगो क्रमशः नियन्त्रणउन्मुख भएको ताप्लेजुङकी सहायक प्रजिअ गायत्रा अधिकारी खड्काले जानकारी दिनुभयो सदरमुकाम फुङलिङबाट आएको दमकल र एक्स्काभेटरको सहायताले बजारमा थप आगो लाग्नबाट रोकिएको हो । आगलागी फैलन नदिन डोजरले कच्ची घरहरू भत्काएको बताइएको छ ।

प्रहरी र स्थानीय मिलेर आगो नियन्त्रणमा लिइएको प्रहरी नायब उपरीक्षक बालनरसिंह राणाले बताउनुभयो । आगो लागीबाट करिब ३ दर्जन घर जलेको अनुमान गरिएको छ । केहीबेरमै सर्वपक्षीय बैठक बस्ने र पीडितहरुलाई क्षतिपूर्तिको व्यवस्थाबारे छलफल र निर्णय गरिने बताएको छ ।

बिहान ९ बजेतिर एक घरबाट सल्किएको आगो बस्तीभरि फैलिएको हो । आगो भोला पौडेलको घरबाट सल्किएको स्थानीयको भनाई छ । पौडेलको घरमा रहेको कपडा पसलमा बिजुली सर्ट भएर आगो लागेको स्थानीयले बताएको छ ।

दोभान जिल्लाकै दोस्रो ठूलो व्यापारिक केन्द्र हो । सदरमुकाम फुङलिङबाट १७ किमि दूरीमा रहेको उक्त बजारमा ८५ वटाजति घर थिए । दोभान मेरिङ्देन गाउँपालिका(३ आठराइ त्रिवेणी गाउँपालिकाको संगम क्षेत्रमा पर्छ ।