काठमाडौं, ३ पुस । रहर नै त हो, एक पटकको जीन्दगीमा केही फरक गरौ, अरुभन्दा केही भिन्न होउ भन्ने जसको पनि सोच हुन्छ । त्यही सोच पछ्याउदै पछिल्लो समय शरीरमा ट्याटु बनाउने क्रेज विशेष गरी युवाहरुमा बढ्दो छ । नाडी, पाखुरा, खुट्टा, घाँटी देखी गोप्य अगं समेतमा ट्याटु खोपाउने ट्रेन्ड पछिल्लो समय चलेको छ । तर क्यानाडाको एक मोडलले भने आफुलाई अन्य भन्दा फरक देखाउन आखाँमा ट्याटु खोपाएकी छिन् । उनको यो कदम भने उनको लागि घातक सिद्ध भएको छ ।

कैट गलिंगर नाम गरेकी २४ वर्षीया मोडलले केही महिना अघि आखाँमा ट्याटु खोपाएकी थिइन् । उनको यो कदमले उनलाई दृष्टिविहीन बनाएको छ । उनले आखाँको सेतो भागलाई बैजनी रङको बनाएकी थिइन् । आखाँको सेतो भाग परिवर्तन गर्न उनले आखाँमा इंक भराएकी थिइन् तर, ट्याटु बनाउने कलाकारले रङ भर्न गल्ती गर्यो । जसका कारण कैटले आखाँमा भराएको इंक नै आखाँबाट आशुँ जस्तै निस्किन थाल्यो ।

ट्याटु बनाए पछि कैटले राम्ररी आँखा देख्न पनि छोडिन् । डाक्टरहरुका अनुसार आँखामा ट्याटु बनाएकी कैटका आँखा सधैँका लागि खराब भएका छन् । उनको आँखा निकाल्नु पर्ने उपचारमा संलग्न डाक्टर बताउँछन् । आफूले आँखामा ट्याटु बनाउनु ठूलो गल्ती भएको कैट सुनाउँछिन् ।