काठमाडौँ, ६ माघ । नेपाल कम्युनिस्ट पार्टी (नेकपा) प्रचण्ड नेपाल पक्षका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीको भाषामा ‘राजा महाराजाहरूको दुर्गन्ध’ आएको बताउनु भएको छ । प्रेस संगठन नेपालको दोस्रो राष्ट्रिय भेलामा सम्बोधन अध्यक्ष प्रचण्डले ओलीको भाषामा राजामहाराजाको दुर्गन्ध आएको बताउँदै प्रतिनिधिसभा विघटनको कदम राजतन्त्र पुनर्स्थापना गर्ने प्रक्रियाको सुरुवात भएको आरोप लगाउनुभयो । उहाँले भन्नुभयो ‘यो राजतन्त्र पुनस्स्थापित गर्ने, निरंकुशतातिर धकेल्ने प्रक्रियाको जुन सुरुवात भएको छ, यसलाई हर मूल्यमा रोक्नुछ ।’

उहाले ओली धुर्त भएका आरोप पनि लगाउनुभयो , ओलीले आफ्नो अधिकारमा नभएको कुरा प्रयोग गरेर प्रतिनिधिसभा विघटन गरेको बताउनुभयो । प्रधानमन्त्रीले संविधानको हत्या गर्न खोजिरहेको आरोप लगाउँदै उहाले यसलाई जोगाउन सडकमा उत्रिनु परेको बताउनुभयो । ‘कसैले आफ्नो बच्चाको हत्या गर्न खोज्छ भने त्यसको रक्षाका लागि जस्तोसुकै कदम चलाउन सक्नुपर्छ,’ उहाले भन्नुभयो । नेपाली जनता सिंहको संज्ञा दिँदै भएको दाबी गर्दै सबैले एकपटक गर्जिनुपर्ने तर्क गर्नुभयो । ओलीको प्रवृत्ति तानाशाही र निरङ्कुश भएको समेत बताउनुभयो । पार्टीभित्र बहुमतको निर्णय लागू हुने विधानमा रहेको स्पष्ट पारे। पार्टी एकता गर्दा ओलीले किर्ते सहमति गरेको दाबी गर्नुभयो । सम्बोधनका क्रममा उहाले आफू कडा भएमा ओलीलाई भित्तामै पुर्‍याइदिने ठोकुवा गर्नुभयो । ‘म अलि भावुक खालको छु फकायो भने फकिहाल्छु। अब केपी ओली तपाइ सकिनुभयो। म युद्दको पनि कमान्डर थिएँ। म कडा भए फेरि भित्तामै पुर्‍याउँछु।’

देश तानाशाहीतर्फ धकेलिने प्रयासको जुनसुकै हालतमा प्रतिवाद गर्नुपर्ने उल्लेख गर्दै प्रचण्डले यो बेलाको बोली हतियारको बोली नभएको तर्क गर्नुभयो । प्रचण्डले ओली खोक्रो राष्ट्रवादी भएको दाबी गर्दै जुन दिनबाट संसद विघटन भयो त्यो बेलादेखि ओलीको हातमा केही नभएको बताउउनुभयो । ‘केपी ओलीको खोक्रो राष्ट्रवादी हो। जुनदिन ओलीले संसद बिघटन गरे त्यदिनदेखि केपी ओलीको हातमा केही छैन।’

उहाले प्राप्त उपलब्धि गुम्ने खतरा भएको र त्यसको सबैभन्दा पीडाबोध आफूले गरेको बताउनुभयो । आफूहरुले कानुनी राजको मान्यतामा हस्ताक्षर गरिसकेकाले हिसांत्मक आन्दोलनतर्फ नजाने पनि बताउनुभयो ।