काठमाडौं, ४ पुस । प्रमुख प्रतिपक्षी दल नेपाली कांग्रेस र जनता समाजवादी पार्टी नेपालबीच दुई बुँदे समझदारी भएको छ। शनिबार अपरान्ह देउवा निवास बुढानिलकण्ठमा दुई पार्टीका शीर्ष नेताबीच भएको भेटमा दुई बुँदे समझदारी भएको बाबुराम भट्टराईका प्रेस सल्लाहकार विश्वदीप पाण्डेले जानकारी दिनुभयो । उहाँका अनुसार दुई पार्टीबीच संसद अधिवेशन तत्काल बोलाउन सरकारसँग माग गर्ने र लोकतन्त्रको रक्षा, भ्रष्टाचार, कोभिड-१९ को विविध पक्ष, आर्थिक संकट लगायतका जनसरोकारका विषयमा संसदमा भएका प्रतिपक्षी दलहरूबीच सहकार्य गरेर अगाडि बढ्ने समझदारी भएको हो।

कांग्रेसकै प्रस्तावअनुसार शनिवार भएको छलफलमा देउवासँगै वरिष्ठ नेता रामचन्द्र पौडेल र डा. मिनेन्द्र रिजाल थिए भने जसपाबाट अध्यक्ष महन्थ ठाकुर र नेताहरु डा. बाबुराम भट्टराई र राजेन्द्र महतो रहेका थिए । त्यहाँ कांग्रेसका शीर्ष नेता पनि सहभागी भएका थिए। साथै संसदमा समन्वय गर्दै सशक्त प्रतिपक्षको भूमिका निभाउन समेत दुबै दलका शीर्ष नेताहरु सहमत भएको नेपाली काँग्रेसले जनाएको छ । । कांग्रेस नेता डा. रिजालले भन्नुभयो ‘कतिपय मुद्दामा हाम्रो मत फरक फरक होला, तर समन्वयत्मक ढंगले काम गर्दै सशक्त प्रतिपक्षको भूमिका निर्वाह गर्नुपर्छ भन्नेमा हामी सहमत भएका छौं’ ।

यस्तै राष्ट्रपति विद्यादेवी भण्डारीले जारी गर्नुभएको संवैधानिक परिषद सम्बन्धी अध्यादेशबारे पनि नेताहरुबीच छलफल भएको छ । प्रधानमन्त्री केपी शर्मा ओलीले परिषद् सम्बन्धी अध्यादेश फिर्ता गर्न आफू तयार रहेको बताएपनि नेकपाभित्रको विवादका कारण अध्यादेश फिर्ता हुन सकिरहेको छैन । संसद अधिवेशन र अरु विषयमा पनि सहकार्य गरेर अघि बढ्नेबारे आजको बैठकमा छलफल भएको नेताहरुले बताएका छन् ।