काठमाडौँ, ३ पुस ।  नेपाल कम्युनिष्ट पार्टी (नेकपा)का अध्यक्ष तथा प्रधानमन्त्री केपी शर्मा ओली र कार्यकारी अध्यक्ष पुष्पकमल दाहाल प्रचण्डबीचको भेटवार्ता सकिएको छ । दिउँसो पेरिसडाँडामा भएको भेला सकिएलगत्तै कार्यकारी अध्यक्ष प्रचण्ड प्रधानमन्त्री ओलीलाई भेट्न बालुवाटार जानु भएको थियो ।

पुस ५ गते स्थायी समिति बैठकको पूर्वसन्ध्यामा भएको हो । भेटवार्तामा यसअघि दुई अध्यक्षबीच भएको सहमति कार्यान्वयनका विषयमा छलफल भएको नेकपा स्रोतले बताएको छ । पुस १ गते स्थायी समिति बैठक बस्नुअघि दुई अध्यक्षबीच संवैधानिक परिषदसम्वन्धी अध्यादेश फिर्ता लिने र संसद आव्हानका लागि राष्टपतिसमक्ष समावेदन प्रस्तुत गर्ने विषय फिर्ता गर्नेबारे सहमति भएको थियो ।

अध्यादेश फिर्ता लिनेबारेमा प्रधानमन्त्री ओलीलाई कार्यकारी अध्यक्ष प्रचण्डले ‘सहमति कार्यान्वयन किन भएन ? ’ भनेर सोधेको स्रोतले बतायो । ओलीले उचित समयमा फिर्ता हुने जवाफ दिएको स्रोतको भनाइ छ । नेकपामा विवाद चर्किँदै गर्दा दुई अध्यक्षबीचको भेटवार्ता पुनः थालनी हुनुलाई कार्यकर्ताहरुले सकारात्मक रुपमा लिएका छन् ।