काठमाडौं, ३ पुस। सत्तारुढ दल नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल पक्षका नेताहरू अहिले पेरिसडाँडामा छलफल गरिरहेका छन् ।

केही जिल्लाका नेकपा नेतासँग अध्यक्ष प्रचण्ड, उपाध्यक्ष वामदेव गौतम, वरिष्ठ नेताहरू माधवकुमार नेपाल, झलनाथ खनाल र नेकपाका प्रवक्ता नारायणकाजी श्रेष्ठले छलफल गरिरहनुभएको छ । पार्टीभित्रको पछिल्लो गतिविधिबारे सामान्य छलफलका लागि नेताहरू भेला भएका अध्यक्ष प्रचण्डको सचिवालयले जनाएको छ । दुई दिनअघि बसेको नेकपा स्थायी कमिटी बैठकमा अध्यादेश फिर्ता लिने निर्णय भएको तर सहमतिअनुसार प्रधानमन्त्रीले अध्यादेश फिर्ता नगरेकाले यसबारे छलफल गर्न नेताहरूलाई परिसडाँडा बोलाइएको नेकपा स्रोतले बतायो । संवैधानिक परिषदसम्बन्धी सरकारले पछिल्लो पटक ल्याएको अध्यादेशसँगै नेकपा विवाद थप बढ्दै गएको छ । दुई दिनअघि बसेको नेकपा स्थायी कमिटी बैठकमा अध्यादेश फिर्ता लिने र संसदको विशेष अधिवेशन बोलाउन गरिएको सांसदहरूको हस्ताक्षर फिर्ता लिने प्रधानमन्त्री केपी शर्मा ओली र कार्यकारी अध्यक्ष प्रचण्ड बीच सहमति भएको थियो ।