काठमाडौं, १३ जेठ । बेलायतमा १५ जुनबाट अत्यावश्यक बाहेकका पसल पनि खुल्ने भएका छन् । बेलायतका प्रधानमन्त्री बोरिस जोन्सनले लकडाउनमा छुट सम्बन्धी नयाँ निर्देशन दिँदै १५ जुनबाट खुद्रा पसलसमेत खोल्न सक्ने बताएका छन् । उनले दोकान सरसफाई गर्न तथा सामाजिक दूरी कायम राख्न आग्रह गरेको बीबीसीले जनाएको छ । उनले आउट डोर मार्केट र गाडीका शोरुम १ जुनबाट खुल्ने छन् । बेलायतमा पछिल्लो २४ घण्टामा कोरोनाका कारण १२१ जनाको मृत्यु भएको छ । बेलायतमा हालसम्म ३६ हजार ९१४ जनाको ज्यान गइसकेको बीबीसीले जनाएको छ ।

बेलायतको स्वास्थ्य विभागका अनुसार बितेको २४ घण्टामा कोरोना भाइरस संक्रमणका कारण १२१ जनाले ज्यान गुमाएका छन् । यससँगै कोरोना संक्रमणबाट ज्यान गुमाउने व्यक्तिहरुको संख्या अब ३६ हजार ९ सय १४ पुगेको छ ।

कोरोना संक्रमणको हिसाबमा बेलायत विश्वका देशहरुको सूचीमा चौथो स्थानमा छ । बेलायतभन्दा अगाडि अमेरिका, ब्राजिल र रुस छन् । मृत्युको हिसाबमा भने अमेरिकापछि दोस्रो स्थानमा बेलायत छ ।