काठमाडौं, २६ बैशाख । संघीय संसदको नया अधिवेशन आजदेखि सुरु हुदैछ । संघीय संसदअन्तर्गत प्रतिनिधिसभा र राष्ट्रियसभाको बैठक आज बेलुकी ४ बजे संसद भवन नया बानेश्वरमा बस्नेछ । मन्त्रिपरिषद्को निर्णय अनुसार गत वैशाख २१ गते राष्ट्रपति विद्यादेवी भण्डारीले आजका लागि दुवै सदनको अधिवेशन आह्वान गर्नुभएको थियो । कोरोना भाइरसको महामारीबाट उत्पन्न त्रासका कारण यसपटक अधिवेशन केही ढिला भएको हो ।

संघीय संसदको बजेट अधिवेशनका लागि संसद सचिवालयले स्वास्थ्यलाई उच्च प्राथमिकतामा दिएर तयारी थालेको छ । आजदेखि सुरू हुने संसदको बजेट अधिवेशनको बैठकमा एक सांसद र अर्को सांसदबीचमा दुई कुर्सी खाली राखिने गरी सामाजिक दूरी कायम गरिने छ । संसदमा प्रवेश गर्ने सांसदहरुले अनिवार्य रुपमा मास्क लगाउनुपर्ने र ज्वरो नआएका सांसदले मात्र प्रवेश पाउने व्यवस्था गरिएको छ ।

त्यस्तै, सेनिटाइजरको प्रयोग गर्ने, हात नमिलाउनेदेखि विश्व स्वास्थ्य संगठनले तोकेका अन्य मापदण्ड कडाइका साथ पालना गर्नुपर्ने छ । संसद भवनबाहिर हात धुन साबुन पानीको व्यवस्था गरिएको छ । सांसदको बीचका दुई कुर्सी खाली राखिएको छ । सांसदलाई मास्क अनिवार्य, सांसदहरूको टेबलमा सेनिटाइजर अनिवार्य र बोल्नुअघि माइक पनि अनिवार्य रुपमा सेनिटाइज गर्नुपर्ने छ । तयारीका विषयमा रणनीति बनाउन यसअघि सिभिल र टेकु अस्पतालका डाक्टरहरुले संघीय संसदको भवन निरीक्षण क्रममा दिएका सुझाव र विश्व स्वास्थ्य संगठनले दिएको मापदण्डअनुसार सबै तयारी सकिएको छ ।

बैठक अवधिभर घरमा गई स्वयम् एकान्तवासको नियमहरुको पालना गर्नु पर्नेछ । कार्यव्यवस्थाले यी लगायत नौ वटा निर्णय गरेको छ । आगामी आर्थिक वर्षका लागि नीति तथा कार्यक्रम संघीय संसदमा जेठ २ गते प्रस्तुत हुने भएको छ । संघीय संसदको संयुक्त बैठकमा सरकारले आर्थिक वर्ष २०७७/७८ को लागि बजेटका प्राथामिकता तथा सिद्धान्त जेठ २ गते पेश गर्ने कार्यतालिका तय गरेको हो । प्रि बजेट छलफल प्रतिनिधिसभामा तीन दिन र राष्ट्रियसभामा दुई दिने हुने छ । प्रतिनिसभामा बैशाख २८, २९ र ३० गते तथा राष्ट्रियसभामा २८ र २९ गते प्रि बजेट छलफल हुनेछ । त्यस्तै सरकारले आर्थिक सर्वेक्षण जेठ १३ गते पेश गर्नेछ । जेठ १५ गते बजेट आउने संवैधानिक व्यवस्था भएकाले त्यसको १५ दिनअघि नै प्रि बजेट छलफल गर्नुपर्ने कानुनी व्यवस्था छ । कोरोनाबाट बच्न सकेसम्म सुरक्षाका उपाय अपनाएर बैठक चलाउने तयारी संसद सचिलायले गरेको छ ।

संसद बैठकमा पहिलो लाइनमा शीर्ष नेताहरु बस्दै आएपनि सचिवालयले पहिलो लहरमा प्रधानमन्त्री मात्र राख्ने तयारी गरेको छ । संसदको अधिवेशनलगत्तै संसदमा सरकारको नीति तथा कार्यक्रम र बजेट पेश हुदैछ । संघीय संसदको राष्ट्रियसभामा सहभागी हुने सांसदहरुले बोल्नका लागि रोष्टम प्रयोग गर्न नपाउने नियम बनाइएको छ ।

राष्ट्रियसभा कार्यव्यवस्था परामर्श समितिको बैठकले सांसदहरुले एउटै सिट प्रयोग गर्नुपर्ने, रोष्टममा मन्त्री र राष्ट्रियसभाको दलको नेताबाहेक अन्यले आफू बसेकै ठाउको माइक प्रयोग गर्नुपर्ने लगायतका निर्णय गरेको छ । कोरोना भाइरसको संक्रमणको जोखिमलाई ध्यानमा राख्दै बैठक कक्षमा प्रवेश गर्ने र बाहिर आउने प्रयोजनका लागि फरक ढोका प्रयोग गर्नुपर्ने नियम पनि बनाइएको छ । त्यस्तै मिडियालाई आम रुपमा सचिवालयले फोटो उपलब्ध गराउने तथा फोटो खिच्न भीड नहुनेगरी व्यवस्थापन गर्ने नियम बनाइएको छ ।