न्युयोर्क, २६ वैशाख । अब न्युयोर्कमा भाडावालले घरभाडा नतिरेपनि घरधनीले भाडामा बस्नेलाई अगस्त २० सम्म निकाल्न नपाउने भएका छन् । साथै यो अवधिमा घरभाडा तिर्न ढिलो भएको अवस्थामा बिलम्ब शुल्क समेत लिन नपाइने भएको छ ।
न्युयोर्कका गभर्नर एन्ड्रयु कुमोले भाडा नतिरेपनि घरबाट निकाल्न नपाइने नियम ६० दिन थपेर अगस्त २० सम्मका लागि कायम गरेका हुन् । आवासीय र कर्मर्सियल दुबैका हकमा यो नियम लागु हुनेछ । अर्थात् घरमा बसेकाहरुलाईमात्र नभई कार्यालय राखेकाहरुलाई पनि घरधनीले निष्काशन गर्न पाउनेछैनन् ।
कोरोना भाइरसका कारण उत्पन्न आर्थिक संकटको सामना गरिरहेका भाडावालहरुलाई सहयोग गर्न गभर्नर कुमोले यस्तो घोषणा गरेका हुन् । कुनै घरवेटीले भाडामा बस्नेलाई निकाल्न खोजेमा वा दुब्र्यबहार गरेमा भाडामा बस्नेले ३११ मा फोन सम्पर्क गरेर यसबारे जानकारी दिनसक्नेछन् ।

न्युयोर्क सिटीमा अहिलेसम्म संक्रमण पुष्टी हुनेहरुको संख्या झण्डै १ लाख ७५ हजार पुगेको छ भने मृतकको संख्या १४ हजार १ सय ६३ पुगेको छ । अरु ५ हजार ३ सय ७८ जना पनि कोरोनाबाटै मृत्यु भएको आशंका गरिएको छ ।

अप्रिल ६ मा न्युयोर्कमा एकैदिनमा ६ हजार २ सय ६ जना संक्रमित थपिएका थिए । तर अहिले क्रमश यो दर घट्दै गएको छ । पछिल्लो एकदिनमा न्युयोर्क सिटीमा १८६५ संक्रमित थपिएका छन् ।

अप्रिल ७ मा न्युयोर्क सिटीमा मृतकको संख्या ५७५ सम्म पुगेको थियो तर अहिले मंगलबारसम्म आइपुग्दा यो दर दैनिक ३० मा झरेको छ ।