एजेन्सी । हालै उत्तर कोरियाका तानाशाह किम जोङ उनको मृत्युको अफवाह संसारभरि फैलियो । आफ्नो डर र शक्ति तथा बयानहरूले चर्चामा रहने किमको मृत्युको खबर सबैको चासोको विषय थियो नै ।

तर, उनको मृत्युको खबर संसारभरि भाइरल भइरहँदा उत्तर कोरियाले यसबारे कुनै प्रतिक्रिया दिएको थिएन । तर, उत्तर कोरियाको छिमेकी देश दक्षिण कोरियाले भने किमको मृत्युबारे प्रतिक्रिया दिएको छ । उसले किमको मृत्यु भएको भन्ने समाचार केवल अफवाह मात्र भएको बताएको छ ।

दक्षिण कोरियाका राष्ट्रपतिका परराष्ट्र सल्लाहकार चुङ इन मुनका अनुसार किम जुङ उन पूर्णतः स्वस्थ छन् ।

रिपोर्टहरूमा उल्लेख गरिएअनुसार मुनले भने, ‘किमका लागि हाम्रो सरकारको धारणा जारी छ, तर उनी जिउँदै र स्वस्थ छन् । उनी अप्रिलको २३ तारिखबाट वोनसन भन्ने इलाकामा बसिरहेका छन् ।’

केही समय पहिले किम बिरामी भएको खबर आएको थियो । उनको मुटुको शल्यक्रिया गरिएको र त्यसपछि संक्रमणको सिकार हुन पुगेको बताइएको थियो । धेरै अन्तर्राष्ट्रिय समाचारहरूमा त उनलाई कोरोना भएको र चिनियाँ डाक्टरबाट उनमा कोरोना सरेको बताइएको थियो ।

उनी १५ अप्रिलमा उनका हजुरबुबाको जयन्तीमा सामेल नभएपछि यो कुरा बाहिरिएको थियो । त्यस्तै त्यसपछि भएको सेना दिवसमा पनि उनको उपस्थिति नभएपछि उन गम्भीर बिरामी रहेको तथा मृत्युसम्म भएको हुनसक्ने आँकलन गरिएको थियो ।