बुटवल, ५ फागुन ।
प्रदेश नम्बर ५ सरकारले आफ्नो २ वर्षे गतिबिधीलाई एक्स्पो गरेर जानकारी दिने भएको छ । सरकारको स्थापनादेखि हालसम्मका काम कारवाही एवं गतिविधि र उपलब्धिबारे जानकारी दिने उद्देश्यले सरकारले प्रदेश एक्स्पो को आयोजना गर्न लागेको बताईएको छ ।
‘समृद्ध प्रदेश, खुशी जनता’को लक्ष्य राखेको प्रदेश ५ सरकारले सरकारको उपलब्धीको जानकारी लिन र त्यस प्रति जनताको प्रतिक्रीया बुझ्न एक्स्पो गर्न लागेको प्रदेश सरकारका आन्तरिक मामीला तथा कानुन मन्त्री कुलप्रसाद केसीले जानकारी दिनुभयो । दाङको बेलझुण्डीमा यही फागुन १० देखि १२ गतेसम्म हुने एक्स्पोको तयारी द्रुतगतिमा भै रहेको मन्त्री केसीले बताउनु भयो ।
प्रदेश एक्स्पोलाई भव्यरुपमा सम्पन्न गर्न प्रदेश नं ५ का आन्तरिक मामिल तथा कानूनमन्त्री कुलप्रसाद केसीको संयोजकत्वमा मूल समारोह समिति गठन गरी आवश्यक तयारी अघि बढाएको बताइएको छ । महोत्सवमा मुख्यमन्त्री तथा मन्त्रिपरिषद्को कार्यालय प्रदेश नं ५ बाट दुई वर्षको अवधिमा गरेका कामको जानकारी गराईने सचिवालयले जनाएको छ ।
एक्स्पोको सचिवालयका अनुसार मुख्यमन्त्रीको कार्यालयबाट मुख्यमन्त्री ग्रामीण विकास कार्यक्रमको जानकारी गराउनुका साथै प्रदेश समन्वय परिषद्का गतिविधिबारे जानकारी दिईने छ । महोत्सवमा सर्वसाधारणका लागि सुझाव पेटिकाको ब्यवस्था गर्दै सोही अवसरमा प्रदेश सरकारले तयार पारेका पुस्तिका तथा पर्चा वितरण गर्ने कार्यक्रम राखिएको छ । आर्थिक मामिला तथा योजना मन्त्रालयबाट पनि प्रदेशअन्तर्गतका स्थानीय तहका अधिकारीका लागि वित्तीय व्यवस्थापनको परामर्श तथा तालिम सञ्चालन गर्ने, लगानी सम्मेलनको तयारीबारे जानकारी गराउने लगायतका कार्यक्रमहरु एक्स्पोकै बिचमा हुनेछन् ।
भौतिक पूर्वाधार विकास मन्त्रालयबाट नवीन निर्माण प्रविधि तथा भूकम्प प्रतिरोधी संरचनासम्बधी प्रदर्शनी, भवन निर्माण प्रविधि, खानेपानी, सिँचाइ नवीकरणीय ऊर्जासम्बधी प्रदर्शनी गर्ने, झुलुङ्गे पुल तथा सडक पुलका नमूना र खानेपानीको गुणस्तर परीक्षणका विधि पनि सो प्रदर्शनीमा देखाइनेछ । उद्योग, पर्यटन, वन तथा वातावरण मन्त्रालयबाट प्रदेश नं ५ को कलासंस्कृति झल्किने नृत्य, सांस्कृतिक कार्यक्रम तथा झाँकी प्रस्तुति गर्ने, भ्रमण वर्ष २०२० को जानकारी तथा प्रचारप्रसार गर्ने, स्थानीय घरेलु तथा व्यावसायिक उत्पादनका सामग्री प्रदर्शन गर्ने छ ।
कार्यक्रममा प्रदेशसभा सचिवालयले प्रदेशसभामा गरिएका कार्यक्रमको प्रस्तुति, नमूना सांसदको अभ्यास तथा प्रदेशसभाको वृत्तचित्र प्रस्तुत गर्ने, विधेयक र स्मारिका वितरण गर्नेलगायतका कार्यक्रम प्रदर्शनीका क्रममा सञ्चालन गरिने आन्तरिक ममीला तथा कानुन मन्त्रालयका उपसचिव हरिहर पोखरेलले जानकारी दिनुभयो।
प्रदेश नं ५ भौगोलिक, जैविक तथा सांस्कृतिक विविधता र प्राकृतिक सौन्दर्यताले भरिपूर्ण प्रदेशका रुपमा रहेको छ । प्रदेश सरकारले ५ नम्बर प्रदेशलाई मिनी नेपालको संज्ञा समेत दिंदै आएको छ । सुस्ता पश्चिमदेखि रुकुमको पूर्वी भागसम्म ५ नम्बर प्रदेशको सिमाना फैलिएको छ । प्रदेश उत्तरमा पुथा हिमालदेखि दक्षिणमा मर्चवारसम्म, पूर्वमा पाल्पाको रामपुरदेखि पश्चिममा र बर्दियाको राजपुरसम्म फैलिएको छ । प्रदेश ५ मा चार वटा उपमहानगरपालिका, ३२ नगरपालिका र ७३ गाउँपालिका स्थानीय सरकारकारुपमा कार्यरत छन् । प्रदेशले २२ हजार २८८ वर्गकिलोमिटर भू–भाग ओगटेको छ ।