काठमाडौं, ८ पुस । भारतले नयाँ नक्सा जारी गरेपछि नेपालसँग उत्पन्न विवादका बारेमा भारतीय पक्षले पत्राचार गरेर वार्ताका लागि आफू तयार रहेको बताएको छ । अघिल्लो महिना नेपालले सो विषयमा पत्र पठाएकोमा अहिले भारतका तर्फबाट पत्राचार गरिएको हो । पत्रमा वार्ताको तिथि भने प्रस्ताव गरिएको छैन ।

भारतले सोमबार मात्रै नयाँ विदेश सचिव तोकेकोले अहिले अवकाश पाउन लागेका विदेश सचिव विजय गोखलेको कार्यकालमा वार्ता हुन सक्ने सम्भावना कम रहेको छ । गोखले जनवरीको अन्तिममा अवकाश पाएपछि सोमबार नियुक्त भएका विदेश सचिव हर्षवर्द्धन शृंगलाले जनवरी २९ मा कार्यभार सम्हाल्नेछन् । परराष्ट्र सचिव शंकर बैरागीले ‘दुवैलाई सहज हुने तिथिमा नयाँ दिल्लीमा वार्ताका लागि प्रस्ताव गरिएको’ बताउनुभयो । यसभन्दा बढी चाहिँ आफूले हेरिनसकेको उहाँको भनाइ छ।

भारतले गएको नोभेम्बरमा सार्वजनिक गरेको नक्सामा कालापानी, लिपुलेक, लिम्पियाधुरालगायतका भूमि भारततर्फ पारिएको थियो । त्यसको नेपालका तर्फबाट सुरुमा परराष्ट्र मन्त्रालयले वक्तव्य जारी गरेर विरोध गरेको थियो भने प्रधानमन्त्री केपी शर्मा ओलीले सर्पपक्षीय बैठक बोलाएर छलफल गर्नुभएको थियो ।

बैठकले प्रधानमन्त्री ओलीलाई नै सो सम्बन्धी मामिला हेर्न जिम्बेवारी दिएको थियो । यस्तै भारतका लागि नेपालका राजदूत निलाम्बर आचार्यले भारतका विदेश सचिव विजय गोखलेलाई भेट्नुका साथै नेपालका तर्फबाट वार्ताका लागि पत्राचार पनि गरिएको थियो । प्रधानमन्त्री ओलीले पूर्वप्रधानमन्त्री माधवकुमार नेपाललाई विशेष दूतका रुपमा पठाउन खोजेको भए पनि भारतीय प्रधानमन्त्री नरेन्द्र मोदीको समय नमिलेको बताइएको थियो ।