जनकपुरधाम, १३ मंसिर । साताहव्यापी रामजानकी विवाहपञ्चमी महोत्सव अन्तर्गत आज आईतवार धनुषयज्ञ सम्पन्न भएको छ । रामजानकी विवाह महोत्सव अन्तर्गत तेश्रो दिन जनकपुरधामको ऐतिहासिक तथा धार्मिक महत्व बोकेको बाह्रविघा रङ्गभुमि मैदानमा विधिविधानपूर्वक धनुष यज्ञ सम्पन्न भएको छ ।

राजा जनकले बरदानमा पाएको धनुषलाई कसैले उठाउन नसक्ने भएपनि सीताले शिवजीद्वारा बरदानमा प्राप्त धनुष उठाएर स्याहार–सुसार गरेको देखेर अचम्म मानी गरेको प्रण अनुरुप त्रेताकालमा आयोजना गरीएको धनुषयज्ञको स्मरणमा विवाहपञ्चमीको तेश्रो दिन धनुषयज्ञको आयोजन गर्ने गरिन्छ । मिथिलाका राजा जनकले शिवजीको धनुषमा प्रत्यञ्चा चढाउन सक्ने पुरुषसंग मात्रै छोरीको बिहे गरिदिने प्रणको सम्झनामा धनुषयज्ञको समारोह आयोजन गरिने जानकी मन्दिरका सह–महन्त रामरोशन दास वैष्णवले जानकारी दिए ।

सोही धनुषायज्ञमा आकाश तथा पतालका सम्पुर्ण देवी देवता तथा  दैत्य दानवले उठाउन नसकेको धनुषालाई भगवान रामले धनुषमा प्रत्यञ्चा चढाएर खण्डित गरेपछि सीतासंग बिहे भएको पौराणिक मान्यता रही आएको छ ।यस अघि शनिवार साँझ विवाहपञ्चमीको दोश्रो दिन फुलबारी लीला सम्पन्न भएको थियो । माता सीताको भगवान रामसंगको पहिलो भेट फूल टिप्न गएकै बेला भएको स्मरणमा फूलबारी लीला मनाइने गरिन्छ । महोत्सव अन्तर्गत पहिलो दिन शनिबार नगर दर्शन कार्यक्रम गरिएको थियो । यसैगरी चौथो दिन अर्थात भोली सोमवार रामन्दिरमा तिलकोत्सव विधि हुने र उक्त अवसरमा राष्ट्रपति विद्यादेवि भण्डारीको समेत सहभागिता रहने सह–महन्थ वैष्णवले जानकारी दिए।

महोत्सव अन्तर्गत पहिलो दिन जनकपुर नगर दर्शन, दोश्रो दिन फूलबारी लीला, तेश्रो दिन धनुष यज्ञ, चौथो दिन तिलकोत्सव, पाँचौँ दिन मटकोर, छैटौँ दिन शुभविवाह र सातौँ दिन राम कलेवा आयोजना गरिन्छ । महोत्सवको अवसरमा जानकी मन्दिरमा धार्मिक कथा वाचन तथा राम लीला र झाँकी पनि प्रदर्शन गर्ने गरिन्छ ।

धनुष यज्ञमा नेपाली काँग्रेसका उपसभापति बिमलेन्द्र निधि, भारतीय राजदूत मञ्जिव सिंह पुरी लगायत हजारौ भक्तजन एवंम नगरबासिको , को समेत सहभागिता रहेको थियो ।