काठमाडौं, १३ मंसिर । नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले नेपाल चीन भारत त्रिदेशीय रणनीतिक सम्बन्ध स्थापित हुनुपर्ने बताउनु भएको छ ।
शुक्रबार काठमाडौंमा नेपाल चाइना मिडिया फोरमले आयोजना गरेको कार्यक्रममा बोल्दै अध्यक्ष प्रचण्डले उक्त कुरा बताउनुभएको हो । उहाँले नेपाल चीन भारत त्रिदेशीय रणनीतिक सम्बन्ध स्थापित गरेर जनस्तरमा सम्बन्ध स्थापित गर्न सके नेपालको आर्थिक प्रगतीमा महत्वपूर्ण भूमिका खेल्ने बताउनुभयो ।

अध्यक्ष प्रचण्डले भन्नुभयो त्रिपक्षीय सम्बन्धको साझेदारीले मात्र आर्थिक, पुर्वाधार विकासमा टेवा पुग्छ । यो युग कनेक्टिभिटीको यूग हो, यसको प्रभावकारी माध्यम सञ्चार हो , रोड, हवाई मार्गबाट हुने कनेक्टिभिटीभन्दा सञ्चार माध्यमबाट हुने कनेक्टिङ बढी महत्वपूर्ण हुन्छ ।

उहाले कालापानी सीमा समस्या समाधान गर्न संयमताका साथ अघि बढ्नुपर्ने समेत बताउनुभयो । लिपुलेक, लिम्पियाधुरा क्षेत्रमा भारत र चीनले मात्र संरचना बनाउने गरेको विषयमा आफूले यसअघि पनि गम्भीर ध्यानाकर्षण गराएको उहाले जानकारी गराउनुभयो ।

हाल देखिएको सीमा समस्याको समाधान तीन देशबीच सहमतिका साथ समाधान गर्नुपर्ने अध्यक्ष प्रचण्डले जोड दिनुभयो । अध्यक्ष प्रचण्डले चिनियाँ राष्ट्रपति सि जिनपिङको नेपाल भ्रमणले नेपाल चीनबीचको सम्बन्धको आयाम झनै फराकिलो भएको बताउदै चिनियाँ राष्टपति सीको नेपाल भ्रमणपछि धेरै क्षेत्रमा सम्भावनाको ढोका खुलेको र नेपाललाई भरोसा थपिदिएको जीकिर गर्नुभयो । प्रचण्डले एक चिन नीतिप्रति नेपालको नीति परिवर्तन नहुने प्रतिवद्धता समेत व्यक्त गर्नुभयो ।